amalinks wokungena

Breaking News

Imidlalo yeCastle Lager Premier Soccer League Ingena Kuviki Yesikhombisa


Castle Lager Premier Soccer League.

Iqembu le Chicken Inn lingena kumidlalo yeviki lesikhombisa eyesigaba se Castle Lager Premier Soccer League lihlezi endaweni yesine kungalane yemiklomelo ikanti iqembu le Highlanders elinqkilana lalo ngoMgqibelo lihlezi endaweni yesithathu nxa usuka emsileni wengalane.

IChicken Inn ilemiklomelo elitshumi lambili ngemva kokuba inqobe kumidlalo emine lanqotshwa kabili kumidlalo eyisithupha eseliyidlalile lonyaka.

Ngakwelinye icele iqembu le Highlanders lilemiklomelo emine ngemva kokuba libe ngutshiki lobhanqa kane lanqotshwa kabili kumidlalo eyisithupha eseliyidlale lonyaka.

Loba kunjalo umqeqetshi weqembu le Highlanders uMadinda Ndlovu utshele intathelizindaba zemidlalo ngoLwesine ukuba akulamehluko okhona phakathi kwamaqembu womabili.

"Siyafana nje. Thina nje asikanqobi kodwa sesidliwe kumidlalo elinganayo. Okuqakathekileyo ngumehluko ozakuba khona phakathi kwethu ngemva kokuba sesidlale imidlalo engamatshumi amathathu lane. Kwazi bani mhlawumbe sizaphutsha imidlalo yalonyaka sesihlezi phezu kwabo. Ukhumbule phela sesidlale imidlalo eyisithupha kuphela lonyaka."

Kweminye imidlalo yesigaba se Castle Lager Premier Soccer League ezadlalwa ngoMgqibelo iqembu le Harare City elihlezi endaweni yesihlanu nxa usuka emsileni lizemukela iqembu elijeke amanye emsileni ele Bulawayo Chiefs ngase Rufaro.

Iqembu le Chiefs yilo lodwa elingela ngitsho lowodwa umklomelo ngemva kokuba linqotshwe kumidlalo emihlanu eseliyidlale lonyaka.

Kweminye imidlalo yangoMgqibelo iqembu le Mushowani Stars lizangqikilana leqembu le Black Rhinos enkundleni ye National Sports Stadium kuthi iqembu le ZPC Kariba lizadlala leqembu le Ngezi Platinum Stars enkundleni ye Nyamhunga.

Imidlalo iyaqhubekela phambili ngeSonto lapho iqembu le Triangle United elizemukela khona ele CAPS United ngase Gibbo, iqembu le Herentals lizadlala lele Manica Diamonds, iqembu le Yadah lizadibana lele Dynamos ngase Rufaro, iqembu le TelOne lizatshayana lele FC Platinum enkundleni yase Luveve kuthi iqembu le Hwange lizadlala lele Chapungu ngase Colliery.

Ezemidlalo siloJoseph Njanji
please wait

No media source currently available

0:00 0:01:55 0:00

Facebook Forum

XS
SM
MD
LG