Imidlalo yeviki lesibili iqale ngoLwesihlanu lapho okudibene khona iqembu le Yadah lele ZPC Kariba enkundleni ye National Sports Stadium njalo umdlalo uphele iqembu le Yadah linqobe nge 1 ka nya.
Kusasa ngoMgqibelo iqembu le Bulawayo City lizemukela iqembu le Chicken Inn enkundleni ye Barbourfields njalo iqembu likamasipala wedolobho lako Bulawayo kuzamele libophe ziqine njengoba abafana be Chicken Inn beqale imidlalo yabo ngolaka olukhulu njengoba ngempelaviki edluleyo bebhaxabule abafana be Bantu Rovers nge 5 ka nya.
Lona iqembu le Bantu Rovers lizavakatshela eZvishavane ukuyadlala leqembu le FC Platinum okungelinye lamaqembu akhangelelwe ukuba engaphakamisa isicoco salonyaka njengoba liqine okumangalisayo.
Umongameli weqembu le Bantu Rovers uMethembe Ndlovu nguye ophethe isikhundla sokuba ngumqeqetshi waleliqembu ngemva kokuba umqeqetshi abakade bemfuna uAgent Sawu evalelelwe phandle yikungabi lesithupha sika CAF A. Loba kunjalo uNdlovu uthi kabasoze bejahe ukudinga omunye umqeqetshi.
'Isimo esikhona akusiso ebesisikhangelele kodwa asisoze sitatazele sicine siqhatsha omunye umuntu ongahambelani lembono esilayo eyokuba kuleliqembu injongo yethu yikuyini'.
Kweminye imidlalo yakusasa iqembu le Black Rhinos lizangqikilana lele Chapungu enkundleni ye Chipadze ese Bindura kuthi iqembu le How Mine lizemukela iqembu le Tsholotsho enkundleni ye Luveve.
NgeSonto iqembu eliphakamise isicoco seligi nyakenye ele Caps United lizadlala lele Harare City enkundleni ye National Sports Stadium, iqembu le Triangle lizemukela iqembu le Dynamos enkundleni yeGibbo kuthi iqembu le Highlanders lizangqikilana leqembu le Shabani Mine enkundleni yeBarbourfields. Umqeqetshi weqembu le Highlanders uErol Akbay uke wakhalala umsebenzi phakathi kweviki ekhonona ngezimali zakhe azikweledwa liqembu njalo utshele intathelizindaba zemidlalo ngoLwesine ukuba lokhu akusoze kuphazamise iqembu lakhe ngoba bona bebengamanga ukuzilolonga.
Umdlalo wokucina kulimpelaviki uzakuba phakathi kweqembu le Hwange leqembu le Ngezi Platinum ozadlalelwa emalahleni.
