amalinks wokungena

Iminjani Imidlalo yeNguqu Ngalimpelaviki?

  • Joseph Njanji

Imidlalo yeCastle Lager Premier Soccer League.

NgoMgqibelo iqembu leChicken Inn lona elihlezi endaweni yesithathu engalaneni yemiklomelo lizadibana leqembu le Ngezi Platinum Stars lona elihlezi endaweni yesibili engalaneni yemiklomelo.

Lumdlalo uzakuba senkundleni yeLuveve edolobheni lakoBulawayo njalo lawamaqembu alingene ngemiklomelo womabili elemiklomelo engamatshumi amabili lesikhombisa loba nje abafana beChicken Inn sebedlale imidlalo elitshumi lane kuthi abe Ngezi sebedlale imidlalo elitshumi lantathu.

NgeSonto komunye njalo umdlalo ophakathi kwamaqembu ahlezi phezu kwengalane iqembu le How Mine lele Highlanders azadibana enkundleni yeBarbourfields.

Lawa maqembu lawo alingene ngemiklomelo womabili elemiklomelo engamatshumi amabili lane (24) kodwa ele Highlanders lihlezi endaweni yesine engalaneni ngoba lihlohle kanengi kuleqembu le How Mine lona elisendaweni yesihlanu.

Iqembu le Highlanders lona selidlale imidlalo elitshumi lane kuthi ele How Mine selidlale imidlalo elitshumi lantathu.

Amaqembu amathathu ahlezi phezu kwengalane athi ele Black Rhinos, ele Ngezi Platinum Stars kanye lele Chicken Inn asebuthelele imiklomelo engamatshumi amabili lesikhombisa iqembu ngalinye kuthi amaqembu angaphansi kwe Highlanders le How Mine abalisa ele Dynamos, ele FC Platinum kanye lele ZPC Kariba alemiklomelo engamatshumi amabili lantathu.

Lesisimo sichazwe ngumqeqetshi weqembu le Highlanders uErol Akbay njengesibonelo esokuba umango usasemude kumncintiswano walonyaka kusigaba sePSL.

Amaqembu ahlezi endaweni eziyithoba minwe mbili engalaneni yemiklomelo aseduze duze kakhulu, yikho ke thina kumele sibone ukuba sidlala ngokuzimisela okukhulu sinqobe kumidlalo emithathu, emine ebuyayo, ukuze lathi siyale silokhu sisendaweni yaphezulu.

Kweminye imidlalo yePSL ezadlalwa kulimpelaviki iqembu le FC Platinum lizemukela ele Tsholotsho kusasa enkundleni yeMandava.

NgeSonto iqembu Bantu Rovers lizadlala lele Chapungu enkundleni yeAscot, iqembu le Triangle lizadibana lele ZPC Kariba eGibbo, iqembu le Hwange lizangqikilana leqembu le Shabanie Mine eColliery, iqembu le Black Rhinos lizadlala lele Harare City ngase Morris Depot kuthi iqembu le Dynamos lizemukela ele Bulawayo City enkundleni yeNational Sports.

Kusenjalo amanye amaqembu azabe engelabadlali kanye labaqeqetshi abayingxenye yeqembu lesizwe elama Warriors lona eliyephatheka kumncintiswano walonyaka owe Cosafa oqhutshelwa elizweni le South Africa njalo oqala ngeSonto usiyaphutsha mhla ziyithoba munwe munye ngenyanga kaNtulikazi.

Leliqembu liqeqetshwa nguSunday Chidzambwa oweqembu leZPC Kariba yena ophathiswa nguLloyd Mutasa oweqembu le Dynamos.

Facebook Forum

XS
SM
MD
LG