amalinks wokungena

Isingeniswa Ngudlu Impahla eZimbabwe Ethengwa Kwamanye Amazwe

  • Martin Ngwenya

Banengi abantu abathenga impahla etshiyeneyo kwele Botswana leSouth Africa.

Abathenga bethengisa impahla phakathi kweZimbabwe leBotswana babikwa sebephila ngokungenisa lezo mphahla ngudlu lokhe uhulumende wabeka isinqumo sokuvimba ukungena impahla ethengwa phandle kwelizwe.

AbeZimbabwe bathi uhulumende kumele acabangisise ngomthetho wokuvimba ukungena kwempahla ethengwa phandle kwelizwe.

Iphephandaba likahulumende eleSunday Mail libike ukuthi ukungenisa impamhla ngudlu kuya kuqonga njalo kuncitsha isikhwama sikahulumende imali ebe izabhadalwa njengomthelo we duty emngceleni.

Bekube kwabalenhlansi yokuthi uhulumende useyesule isinqumo leso ngempelaviki, kodwa kubuye kwachasiswa ukuthi hatshi akunjalo.

Umphathintambo obona ngezamafekithali kanye lokulungiswa kwemphahla etshiyeneyo elizweni, uMnu. Mike Bimha ubebikwe ngamaphephandaba kahulumende esithi umthetho ovimbela ukungenisa imphahla usuyesulwe ngoba usufezile izifiso abakade zifunwa nguhulumende. Kodwa lokhu kulandulwe yiziphathamandla zikahulumende.

Kutshiye abathenga ngaphandle kwelizwe, abafana loNkosikazi Edith Nkala bekhala besithi ngabe uhulumende uyafaka umthelo we duty kulezo mphahla ezikuluhlu olungafanelanga luthengwe phandle kwelizwe.

“Siyadana ukuthi umthetho lo kawukayesulwa, ngoba imphahla iyadula, ikakhulu uma uthenga ngamadola eMelika, ngabe uhulumende uyafaka umthelo we duty, ukuze abantu benelise ukuthenga imphahla phandle kwelizwe beziphilise.”

Kukanti omunye, uMnu. Rodney Moyo okubhizimusi yokuthenga ikakhulu imphahla yezigqoko esiyathengisa emkambo weFlea Market koBulawayo uthi inengi lizithola lingenisa imphahla ngudlu ngenxa yomthetho kahulumende.

“Okunye abantu bacina befaka impilo zabo engozini, benginisa ngudlu ngitsho lamafutha ezimota ngenxa yemithetho le. Ngabe uhulumende uyasizwa isikhalo sabantu ayesule umthetho lo ngoba inengi liphila ngokuthenga lithengisa imphahla evela phandle kwelizwe.”

Uhulumende yena uvika ngelokuthi usake aqhubeke ngalesi sinqumo ngoba esadinga ukuvikela imphahla elungiswa phakathi kwelizwe ngendleko enkulu, kulenengi evela phandle elentengo ephansi ngakho ibulala amafekithali ekhaya kanye lokuncitsha uzulu weZimbabwe amathuba omsebenzi.

Facebook Forum

XS
SM
MD
LG