Ukulwisana phakathi kwamacele ebandla leZanu PF amabili abalisa eleTeam Lacoste leleG40 sokufike emthethwandaba.
Umsekeli kaMongameli uMnu. Emmerson Mnangagwa, yena okhokhela icele leTeam Lacoste umangalele umphathintambo wezemfundo yaphezulu uMnu. Jonathan Moyo esithi ungcolise igama lakhe ngokutshela amalunga eZanu PF politburo ukuthi wajika owake waba yintathelizindaba uMnu Godfrey Majonga ngefasitela ngo1987 ngemva kokumfumana elentombi yakhe kwesinye isitezi eHarare.
Ngenxa yalokhu, uMoyo uthi uMajonga walimala lanamuhla lokhu uhamba ngewheelchair. UMnu. Moyo ulilunga lecele elilwisana lelikaMnu Mnangagwa eleG40.
Emaphepheni awakhweze emthethwandaba ngoLwesine uMnanagagwa ukulandule lokhu njalo uthe uMoyo kumele amhlawule izigidi ezintathu zamadola ngoba engcolise igama lakhe.
Ngakolunye uhlangothi uMoyo ubhekane lecala lokutshaphaza imali yeZimdef.
Kodwa umsekeli kaMongameli welizwe uMnu. Phelekezela Mphoko, yena okucele linye loMoyo, uchothoze ikomishini ebona ngokulwisana lobuhuquluzi, iZimbabwe Anti-Corruption Commission (ZACC) ngokubophisa uMoyo esithi isetshenziswa yizitha zakhe kuZanu PF.
Ekhuluma ngempelaviki uMphoko uchothoze njalo ikomishini le esithi laye iyamcwayisisa ngendaba zobuhuquluzi. Ngalokho, uthe kumele idilizwe.
Ingcwethi zithi konke lokhu kuveza sobala ukuthi impi zebandla leZanu PF sezilwelwa enkantolo. Enye yengcwethi lezi ngumqondisi wenhlanganiso yamagqwetha iAbammeli, uMnu. Tineyi Mukwewa.
