amalinks wokungena

Breaking News

Iqembu leVolleyball Elamankazana eleMpopoma High School Lithola Isicoco Sokudlala Kuhle


Umdlalo weVolleyball

Abathole imivuzo kuloluhlelo oluqhutshelwe edolobheni lako Bulawayo ngoMgqibelo ngabagoqela iqembu le ZRP Raiders lona elinqobe kumncintiswano oqhutshwe phakathi laphakathi kwesizini yanyakenye kucele labesilisa kanye lakucele labesifazane ikanti iqembu le Bulawayo Spartans yilo eliphakamise isicoco se Bulawayo Volleyball Association League kucele labesilisa lakucele labesifazane.

Kumncintiswano wezikolo amaqembu athole izicoco ngabalisa elamankazana ele Mpopoma High School kanye lelabafana ele Luveve High School kuthi kwabenza izifundo zaphezulu amaqembu athole izicoco ngabalisa ele National University of Science and Technology kucele labesifazane kanye lele Hillside Teachers College kucele labesilisa.

Umgcinisihlalo wenhlanganiso ye Bulawayo Volleyball Association uWilliam Mazviro uthe ngokwakuqala ngemva kwesikhathi eside ukuba kuqhutshwe umkhosi wokubonga abenza kuhle kumdlalo we volleyball edolobheni lako Bulawayo.

Ngokubona kwethu loluhlelo luhambe kuhle njengoba lungokwakuqala ukuqhutshwa yinhlanganiso ye Bulawayo Volleyball Association.

Into le sesikhangelele ukuba ibe yinto yomnyaka yonke eyabe isenzakala ekupheleni kwesizini sinanza abantu abenze kuhle kulowo mnyaka kanye lakudala njengalokhu esikwenze namhla sisipha izicoco ze Lifetime Achievement.

Iqembu le Bulawayo Spartans yilo elibe labadlali abanengi abaphiwe izicoco ngemva kokudlala kuhle njengoba kucele labesifazane umdlali walo uMary Matsheza ethole izicoco ezintathu ezibalisa ese Best Attacker, Best Blocker kanye lesokuba yiMost Valuable Player kuthi omunye njalo umdlali weqembu le Bulawayo Spartans uNomagugu Dube nguye okhethwe ukuba yi Best Setter ikanti lomdlali okhethwe ukuba lekusasa elihle uvele kulo njalo iqembu leli.

Lakucele labesilisa bekungesifanayo njengoba umdlali we Spartans uTawanda Makombe ethole izicoco ezimbili ezibalisa esokuba ngu Best Attacker kanye lokuba yi Most Valuable Player ikanti odlala laye uKuda uthole umvuzo wokuba yi Best Setter kuthi uWilling laye ongoweqembu le Spartans uthole isicoco esokuba ngu Best Blocker.

Isifundi sesikolo se Luveve High uEvans Ncube nguye ophiwe isicoco esokuba ngumdlali olekusasa elihle kakhulu.

Isicoco sika nompembe osebenze kuhle kakhulu sithethwe ngu Sikhumbuzo Gwala kuthi umnikazi weqembu le Bulawayo Spartans uVulindlela Moyo nguye ophiwe inhlonipho eyokuba ngumqeqetshi obambe indima enkulu ekuthuthukiseni umdlalo we volleyball ko Bulawayo iLifetime Achievement Award kuthi isiphathamandla esiphiwe inhlonipho efanayo ngu Frederick Ndlovu ikanti umdlali obongwe ngokufanayo ngu Conrad Kupara.

Isiphathamandla senhlanganiso ye Zimbabwe Volleyball Association uBrian Manuel ubuke kakhulu umsebenzi owenziwe ngabe Bulawayo Volleyball Association owokuqhuba lumkhosi owokunanza abadlali lenkokheli zomdlalo we volleyball edolobheni lako Bulawayo.

Thina sitshayela ihlombe inhlanganiso ye Bulawayo Volleyball Association ngokunanza imisebenzi yamaqembu aphatheka kumidlalo ye volleyball ngesikhathi usekelo lwemali lungatholakali kodwa benelisile ukuba umdlalo we volleyball udlalwe yikho siyababonga kakhulu.

Amaqembu aphatheke kumidlalo ye Bulawayo Volleyball Association League nyakenye ngabalisa ele Hurricanes, eleLuveve High School, ele Unit Fairbridge kanye lele ZRP Raiders lawo athole izibongo zokuwabonga ngokuphatheka kwawo nyakenye.

Ezemidlalo siloJoseph Njanji
please wait

No media source currently available

0:00 0:03:26 0:00


Facebook Forum

XS
SM
MD
LG