amalinks wokungena

Breaking News

Inane Lababulawa Yimvukuzane Ebantwaneni Liyaqonga


Ingcwethi kwezempilakahle zithi ukungazinikeli kukahulumende kunhlelo eziphathelene lemvukuzane ehlasela abantwana kuyiwo umgoqo omkhulu emizameni yokwehlisa ukuqonga kwenani labantwana abahlaselwa yile imikhuhlane.

Abezempilakahle bathi imihlobo yemvukuzane etholakala ebantwaneni inengi layo iyelapheka kodwa okusuka kube yisikhubeko yikuthi kayibanjwa masinya ngenxa yokusilela kwemfundiso eneleyo ngalimikhuhlane. Bathi njalo kasikho vele isizatho sokuba balahlekelwe yimpilo abantwana eZimbabwe ngoba lusenqabeleka loludubo nxa umzali ethe waphanga ukuyadinga uncedo.

Udubo lwegciwane lubikwa lalo selwengezelela inani labantwana abahlaselwa yimihlobo ehlukeneyo yemvukuzane okufana lowe “ Capposisaccoma.

Lumhlobo wemvukuzane ubikwa uvame ukuhlasela abantwana abaleminyaka engaphezu kwemihlanu. Abantwana abangabafana babikwa beyibo abavame ukuhlaselwa yilumihlobo wemvukuzane ukwedlula abangamantombazana.

Zibikwa zingakabi sobala izizatho ezibangela imvukuzane ehlasela abantwana okwamanje.

Lanxa zivela sobala izibonakalo zemihlobo yemvukuzane ehlasela abantwana babikwa lokhe bebalutshwana abalutholayo usizo isikhathi sisesekhona. Ezinye zalezi zibonakaliso zibalisa ukuvuvuka kwekhanda, ukuvuvuka isisu, ukuvuvuka entanyeni langaphansi kwendlebe kanye lokopha kokuphela.

Abezempilakahle bakhuthaza abazali ukuthi baze labantwana ezibhedlela ngoba nxa abantwana bethe batholakala belemvukuzane balakho ukwelatshwa kungela mbadalo ikakhulu labo abaleminyaka ephansi kwelitshumi lane yokuzalwa.
XS
SM
MD
LG