amalinks wokungena

Inani Labafele Engozini Yomgwaqo eMvuma Selifike Kumatshumi Amabili

  • Ntungamili Nkomo

Umphathintambo obona ngokulungiswa kwemigwaqo, uMnu. Joram Gumbo, uthi ulusizi kakhulu ngengozi ebulale abantu abangamatshumi amabili eMvuma ngoLwesithathu ebusuku.

Ingozi le yenzakale phakathi kwebhasi yenkampani yeProlina ebisuka eHarare isiya kweleSouth Africa lemota enkulu ebithwele amathaya.

Amapholisa athi ibhasi le leroli zitshayane ziphambana ibhasi yahle yalumatha umlilo abantu abanengi batsha bafela phakathi.

UGumbo ukhuthaze abatshayeli ukuthi bahambe ngonanzelelo olukhulu ngoba imigwaqo eminengi yonakele.

“NjengoMinister of Transport bengicela ukuthi abatshayeli, ikakhulu abahamba ngamabhasi lamagonyethi, bengezwa ukuthi sebediniwe kumele bamise imota baphumule,” kutsho uGumbo.

Ingozi le yenzakalele duzane lomfula uNyamatikiti esabelweni seMidlands.

Abalimeleyo abedlula amatshumi amane balaliswe eGweru Hospital kanye lezidumbu.

Ingcwethi ezicubungula imbangela yokufa komuntu zitshone zihlolisisa ukuthi abafileyo ngobani amagama abo ngoba ezinye izidumbu zitshe zaphosa zaba ngumlotha.

Umgwaqo osuka eHarare usiya eSouth Africa lo uhlala usiba lengozi zomgwaqo njalo banengi abantu asebefele kiwo.

Facebook Forum

XS
SM
MD
LG