amalinks wokungena

Breaking News

Inani Lasebetholakele BeleCovid 19, Seliqanse Laya Kwabangamakhulu Amabili Lantathu-203


Umbiko wabogatsha lwezempilakahle eZimbabwe
Umbiko wabogatsha lwezempilakahle eZimbabwe

Inani lasebetholakale belegcikwane leCovid 19, eZimbabwe, seliqanse laya kwabangamakhulu edlula amabili-203. Leli nani likhuphulwe ngabanye balabo abavele emazweni angomakhelwane, kweleBotswana laseSouth Africa abagcinwe endaweni ezitshiyeneyo zelizwe kuquarantine.

Lokhu sokusitsho ukuba asebegula lumkhuhlane okwamanje sebengamakhulu phose amabili-170, kusinde abangamatshumi amabili lathobamunwemunye-29 kwafa abane.

Asebehloliwe ukuba baleCovid 19 loba hatshi, lokhu laqhamukayo eZimbabwe ngoMbimbitho lonyaka sebezinkulungwane ezingamatshumi edlula amane-46,021.

Emhlabeni jikelele asebefunyenwe belegcikwane leCoronavirus sebeyizigidi ezedlula eziyisithupha-6,403,001. Kuthi asebebulewe yileligcikwane, sebezinkulungwane phose ezingamakhulu amane-378,112, kodwa asebesinde kulumkhuhlane sebeyizigidi phose ezintathu-2,932,293, kubika abenhlanganiso yeWorldometer.

Emazweni awezwekazi leAfrica asebefunyenwe belegcikwane leli, sebezinkulungwane ezedlula ezilikhulu-152,442, labulala inkulungwane ezedlula ezine-4,344, kwasinda inkulungwane ezingamatshumi edlula ayisithupha-63,661 kubika abenhlanganiso eye African Union.

Kusenjalo inani lasebetholakele belegcikwane leCovid-19 edolobheni lakoBulawayo lokhu liqhubekela phambili liqansa ikakhulu ensukwini ezedluleyo. Abogatsha lwezempilakahle bathi lelinani lengezwa ngabavela emazweni angomakhelwane.

UMqondisi wezempilakahle kukhansili yedolobho lakoBulawayo, uDokotela Edwin Sibanda uchaza kabanzi ngokuqhamuka njalo komkhuhlane weCovid 19 edolobheni.

“Sesilabantu abangamatshumi amabili abalomkhuhlane weCovid 9. Kulabobantu sekusile abayisificamunwe mibili kuthi ababili abalokhe bengakasili kusukela uqala bazahlolwa kuyonale iviki sibona ukuthi sebesilile na. Kuyonale iviki sithole abantu abayisificaminwe mibili abatholakale belalo umkhuhlane abane besesibhedlela seMpilo Central Hospital, kuthi omunye ngudokotela kusibhedlela esizimeleyo edolobheni. Sasesithola ukuthi abanye abathathu abafundela ukuba ngodokotela esibhedlela seMpilo Central Hospital bengabafundi beNUST ukuthi baqedise izifundo basebehlolwa bengakaqalisi batholakala belalo umkhuhlane. Omunye ubevela eMutare, eZvishavne leNkulumane. OweNkulumane sisadingsisa ukuthi uwuthethe ngaphi ngoba ethi uhlala eNkulumane. OweMutare leZvishavane sesicele ukuba odokotela lapho abavela khona balandelele imuli zabo ukuba azila na umkhuhlane kanye lokudingisisa ukuba laba odokotela bawuthole ngaphi lumkhuhlane. ”

Abezempilakahle bakhuthaza uzulu ukuba aqaphele ahlale emakhaya ikakhulu kulezi nsuku inani labatholakala beleCovid 19, liqansa okwethusayo. Abantu bakhuthzwa njalo ukuzivikela ekubambeni leligcikwane bengaphongunyakazela ndawana yonke, beminyezelene ngoba ngaleyo ndlela kulula ukuthelelanwa lumkhuhlane.

XS
SM
MD
LG