Ingcwethi zamakolitshi emfundo yaphezulu ezidabuka kwele Bhilithani zikhangelelwe ukwethekelela eZimbabwe lapho ezikhangelelwe ukuthi zizahlangana lezizalwane zalelo lizwe ezifuna ukuyakwenza izifundo eBhilithani.
Mhlaka 4 ngoNhlolanja kuzoba lomkhosi wokuhlanganisa abamele inhlanganiso zezifundi ezifana le World Students’ Advisors, UK Consortium for Africa lengcwethi zemfundo emakholitshini ambalwa agoqela iCardiff Metropolitan University lezizalwane zeZimbabwe ezilesifiso sokuyafunda eBhilithani ozakwenzelwa edolobheni lako Bulawayo.
uNkosikazi Enert Ncube uthe ukungena umhlangano ozakwenziwa akubizi imali. Emhlanganweni lo kuzabe kuxoxiswana ngokuthola imali yemfundo ama-scholarships.
UNkosikazi Ncube uthe inhlanganiso ye UK Consortium for Africa liqembu lamakholitshi emfundo ephezulu esebenza ngokusekela abantwana abafuna ukuyofunda kwele United Kingdom.
“Nxa uyisizalwane seZimbabwe esifuna ukuyofunda kwele United Kingdom sizokuncedisa ukuthi uthole amaphepha azokunikeza imvumo ukuzo funda khona okungasemthethweni, njalo sizokunikeza iseluleko ngokuthi kumele wenzeni ukuze uthole i-scholarship.”
Uthe labo abangela mali enengi ukuze bazibhadalele amavisa ithuba likhona lokuthola usizo kodwa ukuthi uzothola usizo olunjani lokho kusazohambisana lokuthi umuntu ufuna ukufunda kuliphi ikolitshi lemfundo ephezulu.
Laba abafisa ukuthola ulwazi oluthile mayelana ngalo mhlangano owe UK Education Fair njalo lomhlangano wabo owe UK Consortium for Africa lowe World Student Advisors, kumele bathinthe uNkosikazi Michelle Mutasa, osebenza lo Ncube, kunombolo ezithi, 0772-765-332.
