Enye yendizamtshina ezimbili zomkhakha weBoeing 777 ezithengwe yinkampani yeZimbabwe Airways kweleMalaysia izafika eZimbabwe namhlanje ngehola letshumi lambili emini enkulu.
Eyesibili ikhangelelwe kumalanga ambalwa azayo. Indizamtshina lezi zithengwe ngesikhathi kusabusa uhulumende kaMnu Robert Mugabe.
Inkampani yeZimbabwe Airways kahle-kahle akwaziwa ukuthi ngekabani. Okwaziwayo yikuthi ekahulumende yi Air Zimbabwe.
Kodwa impawu zonke zikhomba ukuthi iZimbabwe Airways yinkampani kahulumende.
Kunakanelwa ukuthi uhulumende kaMugabe engaba eyisungule waguqula igama layo ngoba ebalekela izikwelede zenkampani yeAir Zimbabwe. Konke lokhukwenziwe ngudlu.
Ugatsha olubona ngokuphapha kwendizamtshina elizweni olweCivil Aviation Authority of Zimbabwe luthi umphathintambo wezemali uMnu Patrick Chinamasa nguye ozakwamukela indizamtshina le egcekeni leRobert Mugabe International Airport eHarare.