amalinks wokungena

Breaking News

Induna Zithi uMnangagwa Uzaphatha Ukungcwatshwa Kukamuyi uMugabe


Umsekeli kamongameli uMnu. Kembo Mohadi uhamba lequla elilanda isidumbu sikmuyi uRobert Mugabe kwele Singapore.

Induna sezithethe isinqumo sokuthi uhulumende kumele akhokhele ekungcwabeni umuyi uRobert Mugabe, owayengumongameli welizwe leZimbabwe, loba kulabanye abomdeni wakhe abathi akumelanga kwenziwe ngaleyo ndlela.

Abakhonona ngakho lokhu bathi uMongameli Emmerson Mnangagwa labanye bakhe abaphathanga kahle umuyi kulandela ukususwa kwakhe embusweni libutho ngomnyaka ka2017.

Bafisa ukuthi umuyi angcwatshwe duzane lonina umuyi uNkosikazi Bona Mugabe.

Okhuluma emele induna zemangweni wakoMugabe uNduna Katizagombo, elokuzalwa kunguMnu. Gibson Jenami, uthi akusela kuphikisana ngodaba lokuthi umsebenzi wokubekwa kwakhe uphathwa ngayiphi indlela njengoba uhulumende kaMnangagwa esekhokhela kulokho.

UKatizagombo uthi uMnangagwa nguye ozakhokhelela umsebenzi wokubekwa kukaMugabe njengoba bobabili basebenza bonke okwezikhathi esithi kungakazi lozibuse njalo ilizwe selithole uzibuse.

Kodwa abanye abomdeni kamuyi abagoqela uyisekazi kamuyi, uGogo Josphine Jarija, uthi bafisa ukwenza okosiko lwabo ekubekeni omunye wabo.

Lokhu kwaliwe ngesinye isihlobo uNkosikazi Getrude Musarurwa othi kuqakathekile ukuthi abekwe emangcwabeni okubekwa khona amaqhawe esizwe eNational Heroes Acre eHarare.

Umpathintambo wezokwethulwa kwemibiko, uNkosikazi Monica Mutsvangwa, uthi isidumbu sikamuyi sikhangelelwe ukuthi sizathwalelwa eZimbabwe sisuka eSingapore ngoLwesithathu.

Ababukele konke lokhu kusenzakala abagoqela uNkosikazi Eunice Sandi Moyo, owaxotshwa kubandla leZanu PF ngesikhathi uMugabe esuswa esikhundleni libutho, uthi akumelanga abantu baphoselana amazwi aqatha ngokungcwatshwa kukamuyi.

“Thina sikholwa kulokhu ngokukhulunywa yisisekelo sombuso welizwe. Okokuthi umuntu uyazikhethela lapho afuna ukuya khona. Mina leyo angifuni lokukhuluma ngoba angikholwa ukuthi kuzangincedisa. Okungangincedisa yikuthi bazakhuluma labo ngoba kuthiwa uhulumende uyancedisa abafelweyo akutshiwo ukuthi uhulumende uyatshela abafelweyo ukuthi bayenzeni.”

UNkosikazi Moyo ukhumbuze uzulu ukuthi engazihluphi kakhulu ngodaba lolu ngoba ababusayo khonamanje babesebenza lomuyi ekubuseni ilizwe leZimbabwe lokulwisana labantu ababesekela ibandla lePF Zapu besebenzisa iGukurahundi.

Uthi ukungcwatshwa kukamuyi akumelanga kwenze lokhu kulahleke.

Olunye udaba olwethulelwe intathelizindaba ngoLwesibili emhlanganweni lapho okukhulunywe khona ngokungcwatshwa kukamuyi uMugabe, uhulumende uchothoze okwenzakala kwele South Africa okukhahlanyezwa abantu bokuza.

Umphathintambo obona ngokudlelana kwele Zimbabwe lamanye amazwe, uRetired General Sibusiso Moyo, uthi kulabantu abedlula ikhulu lamatshumi ayisikhombisa asebefisa ukuphindela ekhaya kulandela udlakela eSouth Africa.

Udaba Esilethulelwe NguMavis Gama
please wait

No media source currently available

0:00 0:02:51 0:00


Facebook Forum

XS
SM
MD
LG