Inengi eHarare lithi lilokhu lihlalele evalweni kulandela imbiko ethi amapholisa lamasotsha abetshaya abantu mahlayana kulelidolobho, kulandela ukutshengisela okubekhona abanye besola impumela yokhetho olusanda ukwedlula, lapho ibandla le ZANU PF, elinqobe ele MDC Alliance. Umongameli Emmerson Mnangagwa we ZANUPF nguye onqobe uMnu. Nelson Chamisa umkhokheli we MDC Alliance kukhetho lokudinga umongameli , kodwa umanyano lo uthi inhlanganiso ebona ngokuqhutshwa kokhetho eye ZEC iqilibezele.
Amasotsha lamapholisa abikwa abetshaya abantu endaweni ezibalisa; iChitungwiza, Glen View, Glen Norah, Budiriro, le Dzivaresekwa, lakwezinye. Lokhu kwenzakala uMnu. Gift Mtisi igqwetha elimela abantu abangamatshumi amabili lambili ababotshiweyo ngemva kokutshengisela esithi bakhangelelwe ukumiswa phambi kukamantshi emthethwandaba ngoMvulo eHarare. UMnu. Gilbert Thamsanqa Hadebe, osanda ukunqoba kukhetho lokudinga ukhansila we Dzivarasekwa eHarare, elilunga leMDC Alliance uthi omunye okhululiweyo ngamapholisa uthi inani lababotshiweyo lingedlula amatshumi amabili lambili.
Isikhulumeli sikaMnu. Nelson Chamisa okhokhela ibandla leMDC-T kanye lomanyano we MDC Alliance, uMnu. Nkululeko Sibanda uthi lamuhla baqhubekele phambil ngembuthano yokuphikisa impumela yokhetho.
UMnu. David Ndlovu, isiphathamandla sebandla leZANU PF uthi uMnu. Mnangagwa unqobile kukhetho ngakho njengebandla sebekhangelele ukuthuthukisa umnotho welizwe.
Inengi liveza imbono etshiyeneyo ngokuvota kwabantu emaphandleni..
Kusenjalo, uMnu. Dumiso Dabengwa, umkhokheli webandla leZAPU, uchasia ukuthi kungani esithi ibandla leZANU PF kanye lenhlanganiso yeZEC baqilibezele kulolukhetho.
UNkosikazi Sithembiso Nyoni, onqobe kukhetho lokudinga ozamela iNkayi North edale lephalamende uthi uzaqhubekela phambili ngenhlelo ayezisungule, kanye lezinye.