amalinks wokungena

Inengi Lichothoza iEconet Ngokukhweza Imbadalo Yokukhulumisana

  • Ntungamili Nkomo

Uzulu osebenzisa incingo zenkampani kamakhalekhukhwini eyeEconet uthukuthele phezu kokukhwezwa kwembadalo yokukhulumisana enkundleni zebulenjini yinkampani le.

Abanengi bathi kabasoze benelise ukuba besakhulumisana lezihlobo labangane enkundleni ezifana leWhatsApp kanye leFacebook.

Inengi beselisebenzisa kakhulu inkundla lezi ukuxhumana ngoba intengo yokungena ebulenjini ibiphansi kulentengo yokutshaya ucingo.

Kodwa iEconet ithi intengo yokutshaya ucingo isikhwele nge12 cents kumzuzo owodwa kuthi ukungena ebulenjini khona sokubiza i$1 ukusebenzisa amaMegabytes alitshumi kuphela.

AmaMegabytes angamatshumi amahlanu asebiza amadola amathathu.

Okukhona yikuthi akulalutho oluzwayo ongalwenza ebulenjini ngamamMegabytes angamatshumi amahlanu kuphela ngoba ayaphela nje ngokuphangisa.

Intengo le yahlelwa lugatsha lwePotraz ngemva kokuvumelana lamankampani encingo.

Amanye amankampani agoqela iNetOne leTelecel akhangelelwe ukukhweza lawo imbadalo yawo kusikhatshana esilandelayo.

Umphathintambo obona ngokusebenza kwenkampani zencingo uMnu Super Mandiwanzira, olokhe ekukhefu, uthe uzalucwayisisa loludaba ekuphendukeni kwakhe ekupheleni kwenyanga.

Omunye osebenzisa ucingo lweEconet uMnu. Polite Ndlovu utshele iStudio 7 ukuthi ukukhulumisana kwabantu sokuzaba nzima.

“Yindaba ebuhlungu le ngoba abantu bebengasasebenzisi amafoni ukufona kodwa besebegxila kakhulu kunkundla ezifana leWhatsApp leFacebook laboTwitter,” kutsho uNdlovu.

XS
SM
MD
LG