Abazali abanengi endaweni ezitshiyeneyo zelizwe ngoLwesibili bebehlabisa abantwababo abaleminyaka engaphansi kwemihlanu amajekiseni okwenqabela umkhuhlane wendingindi lowembeleko.
Uhlelo lokwenqabela imikhuhlane le lusungulwe ngoMvulo njalo luphela ngoMgqibelo.
Ukudingisisa okwenziwe yiStudio 7 kuveze ukuthi abazali bahamba ngobunengi emakiliniki lezibhedlela ukuyahlabisa abantwana.
Endaweni ezifana lePlumtree, Gwanda, Bulawayo, Mutare, Harare lezinye bekulendwendwe ezinde ngoMvulo langoLwesibili.
Umkhankaso wokukhuthaza abazali ukuyahlabisa abantwana uqale ngempelaviki inkampani yencingo zabomakhalekhukhwini, eyeEconet ithumela bonke abasebenzisa incingo zayo imbiko ibakhuthaza ukuthi bayehlabisa abantwana.
Abantwana banikwa njalo ama-Vitamin A supplements, wona aqinisa amasotsha emizimba yabo ukuze bengahlaselwa kalula yimikhuhlane etshiyeneyo. Akulambadalo ekhona.
Umkhuhlane wendingindi lowembeleyo iyelaphekayo, kodwa ngenye yemikhuhlane ebulala abantwana abanengi elizweni ngoba kulabazali abangahambiyo ukuyahlabisa abantwana.
Abanye babantu laba ngabesonto yesipositoli. Kodwa ngenxa yomkhankaso omkhulu kahulumende eminyakeni esanda kwedlula, inengi labo libikwa selihlabisa abantwana.
Udokotela Wedu Ndebele ubona ngokwelatshwa kwabantwana esibhedlela seMpilo koBulawayo.
Undebele uthi kuqakathekile ukuthi wonke umzali olomntwana oleminyaka engaphansi kweminhlanu, emakhaya lemadolobheni, ayemhlabisa loluhlelo lungakapheli ngoMgqibelo.
Uhulumende uqhuba loluhlelo encediswa zinhlanganiso ezifana leUnicef, American Red Cross, U.S. Center for Disease Control, i Measles-Rubella Iniative lezinye ezitshiyeneyo.
