Umsekeli kamphathintambo obona ngokwethulwa kwemibiko uMnu Energy Mutodi usexolisile kuzulu phezu kwamazwi akhe awokuthi abantu besiNdebeleni ngabokuza abamukelwa kuhle ngabesiShoneni eZimbabwe babagcina ngesikhathi bebalekela uTshaka.
Ekhuluma ngokuhlaselwa kwabakwamanye amazwe eSouth Africa ngoLwesibili, uMnu Mutodi uthe lelolizwe kumele livikele abokuza ngoba labo njengabantu besiShoneni bavikela amaNdebele, wona athi yizizalwane zakweleSouth Africa.
Uthe ngokuchothozwa ngabantu abanengi, uMnu Mutodi wasexolisa enkundleni yeTwitter izolo esithi amazwi akhe asesetshenziswa ngabamabandla aphikisayo ukumchothoza. Ngokunjalo, uthe uyaxolisa ngoba ubengajonganga ukuzwisa abanye ubuhlungu kumbe ukuphehla inzondano.
Lanxa abanye besithi bayakwamukela ukuxolisa kwakhe, abanye bathi kabakwamukeli. Sixoxe lengcwethi ecubungula ezombusazwe uMnu Kholwani Nyathi, yena ongumhleli njalo wephephandaba elizimeleyo eleThe Standard ukuze sizwe imbono yakhe ngalolidaba.
