amalinks wokungena

Breaking News

Ingculaza Isitshiya oGogo Begcina Intandane


Umkhuhlane wengculaza usutshiye oGogo besenkingeni yokondla abazukulu asebetshiywa bezintandane ngabantwababo baphinde bagcine labagulayo esikhathini sebephelelwe ngamandla, lelizwe lingaselanhlelo zokusekela abaswelayo.

Kulokhu kwakhutswa umthetho we Old Age Pensions Act, ilizwe alikabi lomthetho ocacileyo wokunanza amalungelo lempilakahle yalabo asebekhulile.

Izolo bebethi uyadela owazalayo ngoba eleqiniso ukuthi ulaye ozamnakekela kusasa abone ukuthi indingeko zakhe ziyagcwaliseka kodwa lamhla ingculaza isithanyele inengi lentsha yatshiya abadala egcekeni bekhala nje ngokuthi hayi ukuguga kulamanyala.


Lamhla, ingculaza isidiliza zona indiwo ezilamasi, itshiya izalukazi lamaxhegu eqala kutsha imizi ezama ukukhulisa intandane eziseleyo.

Inhlanganiso yasebekhulile iHelp Age Zimbabwe ithi kulihlazo ukuthi ilzwe alilanhlelo zasebekhulile kumbe imithetho ebavikelayo bona befika isikhombisa ekhulwini yezizalwane zakuleli.

Inhlanganiso ebona ngezempilakahle emhlabeni, iWorld Health Organisation ithi amatshumi ayisikhombisa ekhulwini – 70% labantu abanakekela labo abaphila legcikwane ngabesifazana abaleminyaka engaphezu kweminyaka engamatshumi ayisithupha kuthi isitshiyagalolunye etshumini lentandane ligcinwe ngogogo.

Inhlanganiso ezikhangela amalungelo asebekhulile kudaba lwengculaza zithi uhulumende ulomlandu wokusungula isikhwama semali ezancedisa ukuthola ukudla, imali yokubhadalela intandane indingeko zesikolo, imali yemithi kulabo abagulayo kanye lolwazi ngomkhuhlane wengculaza ukuze asebekhulile benelise ukunakekela abagulayo lentandane abazitshiyelwayo.

Inhlanganiso yeHelp Age Zimbabwe ithi kusadingeka ukuthi ilizwe libeke imithetho ezavikela amalungelo lempilakahle yasebekhulile.

please wait

No media source currently available

0:00 0:04:39 0:00
Lapho esitholakala khona
XS
SM
MD
LG