amalinks wokungena

INgezi Platinum Isihlezi Phezu Kwengalane yePremier Soccer League

  • Joseph Njanji

Ngezi Platinum Stars

Iqembu lomdlalo wenguqu ele Ngezi Platinum Stars yilo eselihlezi phezu kwengalane yemiklomelo kusigaba se Castle Premier Soccer League ngemva kwemidlalo yeviki lamatshumi amathathu.

Abafana be Ngezi Platinum sebelemiklomelo engamatshumi ayisithupha ngemva kokunqoba abakwenze iqembu le Dynamos nge 2 ka nya ngoMgqibelo.

Endaweni yesibili kuleqembu le FC Platinum lalo elilemiklomelo engamatshumi ayisithupha kodwa lihlohle kalutshwane kulele Ngezi Platinum.

Iqembu le FC Platinum yilo ebelikhokhela engalaneni yemiklomelo phambilini kwemidlalo yangempelaviki kodwa lihwithwe ngele Ngezi ngemva kokuba ngutshiki lobhanqa lele Harare City 0 ka 0.

Kundawo yesithathu kuleqembu le Dynamos lona eselitshiywa ngemiklomelo emibili liqembu le Ngezi kuthi ele Chicken Inn lisendaweni yesine lilemiklomelo engamatshumi amahlanu lesithupha.

Kusele imidlalo emine ukuba imidlalo iyefika komlindi uyacina njalo intathelizindaba yezemidlalo uNation Ndlovu uthi inkatha izawela loba yiliphi phakathi kwamaqembu ezimbamgodi iNgezi Platinum kanye le FC Platinum.

“Ngokubona kwami inkezo lonyaka izaphakamiswa ngelinye lamaqembu ahlanganisela ele Ngezi Platinum kanye lele FC Platinum imbangela kuyikuba yiwo ahlezi phezulu njalo adlala kuhle. Umdlalo abazawudlala bebonke yiwo ozatshengisa ukuba ozakuba ngumanqoba ngubani.”

Owake wadlalela iqembu le Tsholotsho uRodreck Jecha Mufudza yena uthi iqembu le FC Platinum lilakho ukuphakamisa inkezo nxa kukhangelwa ukuba lawamaqembu adlale njani lonyaka.

“Nxa sikhangela indlela amaqembu ancintisa ukuphakamisa isicoco adlale ngayo lonyaka iqembu le FC Platinum lidliwe kabili kwathi ele Ngezi lidliwe kumidlalo eyisithupha yikho kukhanya angani ele FC Platinum lizanqoba lonyaka. Phezu kwalokho lawa maqembu azadibana ekhaya le FC Platinum engahle iyephezulu nxa ingenelisa ukunqoba.”

Ngaphansi kwengalane impi yokusinda ekugunyulweni layo ivutha amalangabi njalo ngaphandle kweqembu le Bantu Rovers lona osekusegcekeni ukuba seligunyuliwe amaqembu abalisa iTsholotsho, iHwange, kanye le Shabanie Mine okuyiwo ahlezi endaweni ezine ezingaphansi kwengalane alokhu elawo amathuba okusinda loba nje ele Tsholotsho kuzamele lenze izimanga ukuba lisile ngoba kumele linqobe kuyo yonke imidlalo yalo elizayidlala lamaqembu agoqela amabili alwisa ukuphakamisa isicoco ele FC Platinum kanye lele Chicken Inn.

Kumdlalo kakhilikithi: Usuku lwesibili olomdlalo wesibili owohlobo lweTest ophakathi kweqembu le Zimbabwe lele West Indies lufike emaphethelweni iqembu West Indies selitshaye ama runs angamatshumi ayisikhombisa lathoba minwe mbili (78) lilahlekelwe ngumdlali owodwa.

Lokhu kutsho ukuba iqembu le West Indies likhokhelwa ngama runs angamakhulu amabili lamatshumi amane lethoba minwe mbili (248) njengona ele Zimbabwe ku-innings yalo yakuqala libuthelele ma runs angamakhulu amathathu lamatshumi amabili lesithupha (326).

Facebook Forum

XS
SM
MD
LG