amalinks wokungena

Kukhankaselwa Ukuthi Uzulu Engayi Edilini Lika Mugabe


UMongameli Robert Mugabe lomkakhe, uGrace Mugabe, basika ikhekhe lokunanza ukuzalwa kukaMugabe.

Inhlanganiso ezitshiyeneyo zibikwa ukuba zikhuthaza uzulu ukuthi engayi emkhosini wokunanza ilanga lokuzalwa likaMongameli Robert Mugabe ozakwenzelwa esikolo seRhodes Preparatory Primary School eMatobo, esabelelweni seMatabeleland South.

Kubikwa ukuthi okwenziwa zinhlanganiso lezi kusekelwa ngabantu abanengi abathi akumelanga uMugabe ananze ilanga leli ngenxa yokuthi uzulu uyadubeka.

Lokhu kubuya ngesikhathi abaqoqa umkhosi lo owenziwa ngaphansi kombuthano obizwa ngokuthi yi-21st February Movement besithi aqhubeka ngemfanelo amalungiselelo okunanza ilanga leli.

Abakhonona kakhulu eMatobo bathi idili leli lenziwa ngesikhathi kusanda kubhubha induna enkuluu uMasuku. Bathi lokhu akulunganga njengoba uMasuku wayeyinduna ehlonitshwa kakhulu okumele ukuthi izilelwe phose okomnyaka wonke kungenziwa amadili anje.

Owathatha isikhundla sakhe, uMnu. Killion Masuku, uthi isimanga yikuba kanxuswanga njalo loba bengamxisanga angeke aye emdlalweni lo ngoba basakhalela uyise olempahla ezilokhe zingakachithwa.

Unobhala wenhlanganiso elwela amalungelo abantu eyeBhetshu LikaZulu, uMnu. Mbuso Fuzwayo, ukhuthaza abantu ukuba bengayi kuthi labo abazaya khona behambe begqoke ezimnyama.

UMongameli we Alliance for National Salvation, uMnu. Moses Mzila-Ndlovu, laye ukhuthaza abantu ukuthi bengayi.

Uthe uMugabe usithathaphi isibindi sokuzothunuka abantu bakoMasuku bona besakhala kungakabi lomnyaka iNduna uMasuku ekhotheme.

UMnu. Nelson Mvundla, olwela ilungelo loluntu, uthe uMugabe uyadelela ngokuthi abuye eMatopos ezekwenza idili lokuzalwa kwakhe abantu beMatobo belokhe bekhalela immuli yako Masuku.

UMvundla uphinde wathi uMugabe uyakwazi akwenza ngesikhathi seGukurahundi ngakho-ke kuyinhlamba emangalisayo ukuthi azekwenzela idili lakhe eMatobo.

UNkosikazi Efdis Ndebele losakhulayo uAnele Sibanda bevumelane lamazwi kaMvundla besithi kuyabakhathaza kakhulu okwenziwa nguMugabe.

Kasenelisanga ukuxoxa labakubandla leZanu PF ngodaba lolu.

Facebook Forum

XS
SM
MD
LG