Inhlanganiso ezisebenzalana lozulu ziyavumelana ukuba uzulu kumele afundiswe phezu kwemali yama Bond Notes, uhulumende aseyiletha, ayizwisise imbangela yenkinga kwezomnotho esisenza uhulumende athathe lelinyathelo emizameni yokuvala izikhexe ezibangelwe yikwehluleka kwakhe ukulondoloza inotho yelizwe.
Emhlanganweni womanyano wenhlanganiso, ezizimeleyo phansi komanyano we Crisis Coalition in Zimbabwe, owenzelwe emahofisini eZimRights eHarare, inkokheli yazo, ivumelene ukuba sesifikile isikhathi sokuba luxazululwe kuzulu udaba olwenzakala elizweni kwezomnotho okubalisa udaba lwama Bond Notes.
Abangene lumhlangano babalisa umnumzana Pride Mukono, omunye wabaphatheke emikhankasweni yokuletha uhulumende woqobo, ogcizelele ukuba kumele azizwisise uzulu, inkinga ezibangele ukuba ilizwe libe kulesi simo kwezomnotho.
Ekhuthaza abantu ukuba bangaze bavumela inkokheli idlala ngenqondo zabo.
Ethi imali yeBond Note kungayisiyo nkinga elizweni uzulu okumele agxile kiyo, inkinga ethi kuyibukhokheli osebungelandaba labantu.
Omunye njalo wabaphatheke emikhankasweni yezombusazwe, u Ostallos Gift Siziba uthi uzulu makafundiswe ngokwenzakalayo kwezomnotho hatshi ukuba abe ngowokuvhota nje kuphela.
Ethi lokhu kuzasiza ekuthini avukeleke inqondo uzulu, azi isisusa sokudubeka kwakhe anduba akulungisise esazi ukuba uqala kuphi.
Abenhlanganiso lezi bathi umanyano kuyiyo indlela engaphathisa ekuqhubeni imisebenzi, yileyo laleyo inhlanganiso idlala ihlandla layo ekusebenzeni lozulu, ukumtholisa ulwazi olujulileyo lokwezenzakala elizweni.
Kuvunyelenwe njalo kulomhlangano, ukuba zihlahlelwe zonke indaba ezibangele ukuba kulesi simo kwelizwe kwezomnotho, afundiswe ngazo uzulu kusetshenziswe indlela ezizokwamukelwa nguzulu, hatshi lokho okwenzakalayo, lapho etshiywa ngaphandle lapho kuqhutshwa imikhankazo eyehlukeneyo.
