Uhlelo lokuthapha imibono kazulu ekulotshweni kwesisekeko sombuso esitsha, lukhangelelwe ukusiwa lakulabo abasemajele ukuthi baphe imibono yabo.
Lokhu kubikwe ngomunye wabagcinisihlalo bekhomidi yephalamende ebona ngokulotshwa kwesisekelo, uMnu Douglas Mwonzora, ekhuluma lalumsakazo ngolweSithathu.
Kusenjalo inhlanganiso ezizimeleyo ziqhubeka ziveva sobala ukwethuselwa kwabantu kwezinye izigaba zelizwe ngabacatshangelwa ukuthi ngabasakeli beZANU PF. Inhlanganiso yezisebenzi zemaphulazini eye GAPWUZ ibika ngokwethuselwa kwamalunga ayo ukuthi engakhulumi akufisa kungene kusisekelo sombuso.
Kodwa esigabeni seleMandebeleni ukwethuselwa kwabantu kubikwa kukulutshwana kakhulu.
UBrenda Moyo weStudio 7 ukhulume lowayengumeli wesigaba seHwange East edale lephalamende uMnu Thembinkosi Sibindi othi uhlelo lwe Outreach luqhubeka kuhle kakhulu.
UBrenda Moyo uphinde waxhuma uNkosikazi Annastacia Moyo umqondisi wenhlanganiso yeBulawayo Agenda othi abesifazane bakhanya besesaba ukutsho imibono yabo emihlanganweni yokwamukelwa kwemibono kazulu.
UBrenda uphinde wakhuluma loNkosikazi Gladys Gombami Dube umsekeli womunye wabagcinisihlalo beCOPAC ochasisa ukuthi umsebenzi uqhubeke kuhle namhla esitsho izigaba abazazethekelela kusasa.