Inhlanganiso yabahleli eyeZimbabwe National Editors Forum kumbe iZINEF iphume ijumo ibhoda ngelizwe lonke ihlangana lentathelizindaba izikhuthaza ukuba phambilini kokhetho kumele zilandele imilayo yokuloba indaba eziqotho ezingela nkethabetshabi lokusekela uhlangothi.
Ekhulumisana lentathelizindaba koBulawayo eMedia Centre, umqoqi wenhlelo zeZINEF, uMnu. Njabulo Ncube oyintathelizindaba edumileyo uthi abahleli kumele behlukane lomkhuba wokuphongukuloba nje mahlayana bengalandeli iziqiniseko zokuloba.
UMnu. Ncube uthi sebebhode kwezinye izigaba zelizwe njalo lapho abangakafiki khona basazofika ukuze kungabi lamuntu osola indlela intathelizindaba eziloba ngakhona.
UMnu. Silas Nkala intathelizindaba esebenzela iNewsday koBulawayo uchaze ukuba kuqhakathekile ukuba inhlangothi zonke ezibona ngezokhetho zilandwe lazo kukhulunyiswane ngokusebenzelana leNtathelizindaba ngoba ukungasebenzelani yikho okudala ukusolana.
UNkosazana Lulu Brenda Harris uthe labezombangazwe abazayethusela iNtathelizindaba kumele babhalwe ukuba yinto abayenzayo ngoba bawujwayele lumkhuba wokwethusela.
UMnu. Lungele Ndlovu uthi ukuvikeleka kwabo ngesikhathi kulandwa isikahthi sokhethi kubuvilibana ngoba sebekhona abacuphi asebeqalile ukuhamba bebalandelela befuna lokubakwazi inombolo zabo zocingo lokuthi bahlala kuphi.
UMnu. Brain Marandu yena ukhuthaze intathelizindaba ukuba zingesabi ukuloba iqiniso lakho konke okuzakwenzakala ngesikhathi sokhetho ngoba kungumlandu wazo.
Intathelizindaba, ikakhulu ezisebenzela uhulumende zihlezi zisetheswa icala lokwethula indaba ezisekela uhlangothi, ikakhulu ngalesi sikhathi ilizwe libhekane lokhetho kunyana ezimbalwa ezilandelayo.