amalinks wokungena

Breaking News

Inhlanganiso yeAfri-Forum Lokhu Ifuna Ukubophisa Unkosikazi Grace Mugabe Ngokubhaxabula Intombazana ye South Africa


Grace Chiwenga

Inhlanganiso yakweleSouth Africa elwela amalungelo eye Afriforum, emele unkosazana Gabriella Engels owatshaywa ngunkosikazi Grace Mugabe, ithi iqhubekela phambili ngemizamo yokuthi unkosikazi Mugabe abotshwe ngaleli cala lobanje angasenguye mka mongameli welizwe.

Linhlanganiso ithi loludaba luyabuyela emthethwandaba ngenyanga kaNkwenkwezi.

Umkhokheli wenhlanganiso ye AfriForum umnumnzana Kallie Kriel utshele iStudio 7 ukuthi unkosikazi Grace Mugabe wetheswa icala lokutshaya unkosazana Gabriella Engels, hatshi ngoba engunkosikazi walowo owange ngumongameli uMnu. Robert Mugabe, kodwa ngenxa yokuthi wadala icala elidinga ukuthi ajeziswe.

“Sizimisele ukwenza konke okusemandleni ethu ukubona ukuthi unkosikazi Grace Mugabe uyajeziswa ngodaba lokutshaya unkosazana Gabriella Engels. Sizabe sisemthethwandaba we Hight Court e Pretoria mhlaka 10 lo 11 Nkwenkwezi, sifaka isicelo sokuthi umthethwandaba wesule isivikelo sokungabotshwa esanikezwa unkosikazi Mugabe, ukuze azothonisiswa ngecala lakhe eSouth Africa,” kutsho uKriel.

Lelinyathelo le Afriforum selivuse imbono ehlukeneyo kuzizalwane zeZimbabwe.

Isizalwane seZimbabwe umnumnzana Khulekani Dube uthi ukuthonisiswa kukankosikazi Mugabe ngecala alidala kweleSouth Africa kuzakuba yisibonelo esihle kwabezombusazwe eZimbabwe, ukuthi linto yokwephula amalungelo oluntu mahlayana eZimbabwe, ngeke bahambe bebukwa ngayo lakwamanye amazwe.

“Ngibona kufanele ukuthi i Afriforum iqhubeke ngaleli cala ngoba akekho umuntu olelungelo lokutshayanje umuntu. Nxa umuntu ekonele kufanele umbophise or umuse emthethweni. So lokho akwenzayo yikudelela plus elizweni labanikazi. Ujwayele ukukwenza elizweni lakithi ngoba awethu amalungelo basiphuca wona so bayakwazi ukwenza loba yini phezu kwethu sebethatha lelo thuba bezolisebenzisa kwezinye indawo,” kutsho uDube.

Kodwake esinye isizalwane seZimbabwe uMnu. Greatman Mkhwebu uthi akasiboni isizatho sokulandelela unkosikazi Mugabe ngaloludaba. Uthi okusemqoka yikuthi unkosikazi Mugabe wayekhuza abantwana njengomuntu omdala ngakho i AfriForum kayekele ukugxamukela kuloludaba.

“Mina ngombono wami ngibona ukuthinje badlala ngesikhathi laba abantu. Angazi lokuthi bazama ukwenzani ngoba eqinisweni mpela angiboni lokuthi umfazi kaMugabe wayengayisukelanje ayishaye lintombazana ingonanga lutho ngoba ngumuntu omdala lowana. Kanti why bengaqhamuki lento sizwe ukuthi isisusa yini ngoba njalonje sonke isikhathi akuveli ukuthi intombazanale ize itshaywe yayitshayelwani,” kutsho uMkhwebu.

Umnumnzana Kriel uthi lobanje unkosikazi Mugabe engasenguye nkosikazi kamongameli welizwe, akulula ukuthi abotshwe ngalelo cala nxa engangena kweleSouth Africa kungakakhitshwa isivikelo sokungabotshwa asiphiwayo.

Uthi nxa leso sivikelo singasuswa kutsho ukuthi unkosikazi Mugabe ngeke esangena kwele South Africa ngoba angavele angene uyabotshwa athonisiswe.

please wait

No media source currently available

0:00 0:02:41 0:00

Facebook Forum

XS
SM
MD
LG