amalinks wokungena

Breaking News

Inhlanganiso yeChristian Alliance Imangalela Amapholisa kuJOMIC


Inhlanganiso yamabandla esiKristu i Zimbabwe Christian Alliance isikhweze izikhalazo kumanyano weJOMIC obona ngokusebenza kukahulumende womanyano, kulandela ukuphazamiswa komhlangano wabo ngamapholisa lokubotshwa kwabafundisi abane. Kubika uNothando Sibanda ekoBulawayo.

Abantu abalitshumi lantathu ababotshwe ngoMgqibelo emthandazweni wokuletha ukuthula elizweni bebelokhu bevalelwe esitokisini ngoMvulo. Icele leMDC elikhokhelwa nguMnu. Morgan Tsvangirai labaqoqe lumbuthano batshele iStudio Seven ukuthi inengi labantu laba, abagoqela abafundisi ababili, batshywe kabuhlungu ngamapholisa esitokisini.


Elinye ilunga le MDC uMnu. Shakespeare Mukoyi, ongumsekeli kamgcinisihlalo we Harare Province obebikwa ethunjiwe, utholakale laye ngoMvulo esitoksini eHarare Central lapho abikwa elamanxeba esabekayo ngemva kokutshaywa ngamapholisa.


Amapholisa angene ngodlakela esontweni ye Glen Norah ahaza intuthu ehitshayo abhaxabula abantu abakade bethandaza njalo benanaza ilanga lomthandazo ofanayo owenziwa ngomnyaka 2007, lapho okwabotshwa uMnu Morgan Tsvangirai umkhokheli weMDC-T kanye lomkhokheli wenhlanganiso elwele ukulotshwa kutsha kwesisekelo sombuso uMnu Lovemore Madhuku.


Umqondisi we Christian Alliance of Zimbabwe, abayibo abaqoqe lumthandazo, uMfundisi Useni Sibanda utshele iStudio 7 ukuthi amapholisa akhanya esefuna ukubaza icala lodlakela asebefuna ukwethesa izibotshwa lezi.

XS
SM
MD
LG