Izizalwane zeZimbabwe ezidabuka esiqintini seMatobo ezansi yeMandebeleni ezisebenza kweleSouth Africa sezisungule inhlanganiso yezentuthuko zavula lekheli yebulenjini ukuze zithole imali yokuthuthukisa impilo kazulu kule indawo.
Intathelizindaba yeStudio Seven Benedict Nhlapho uxoxa labeZimbabwe laba abathi sebecabange ukuzenzela njengoba selokhu ilizwe lathola uzibuse umphakathi wale indawo ulokhu engakayitholi impucuko.
Isiqinti seMatobo ngenye yezindawo ezisezansi yakweleMandebeleni ezisasilela kakhulu ngenhlelo zethuthuko ezifana lemigwaqo, amanzi, impucuko ezikolo kanye lenhlelo ezidala imisebenzi. Ukudla lakho kuyasilela kakhulu kule indawo ngenxa yokusilela kwezulu.
Lokhuke yiko osekwenze izizalwane zakulesisiqinti ezisebenza kwele South Africa zamanyana lomphakathi wale indawo babumba inhlanganiso yezentuthuko abayibiza ngokuthi yiMatopos Community Trust Fund.
Isiphathamandla sale inhlanganiso umnumnzana Jelous Nkomo odabuka eSontala eKezi, uthi kunengi asebekwenzile endaweni ezibalisa iSontala., eSilongwe, eMbembeswana leMloyi. Uthi njengoba lendlala kuyinto ehlukumeza uzulu kakhulu kulesisiqinti, baphakathi kokusungula inhlelo zokulima ngokuthelezela endaweni yeSilongwe.
UNkomo uthi kulequla labatsha kule inhlanganiso eselihleke ukuthuthukisa ezemfundo lahle laqala ngesikolo seSontala Primary.
Sebesungule njalo inkezo yezemidlalo yenguqu ehlanganisa izikolo zeSontala. Silongwe, Mbembeswana leMloyi lapho abanqobayo bephiwa khona imali yokuthenga abakuswelayo ezikolo zabo.
Elinye ilunga lale inhlanganiso umnumnzana Musa Ngwenya uthi inhlanganiso yebole isilo mfutho omangalisayo ngemva kokuqala ihamba ngonyawo lonwabu ngo 2009.
Uhlupho olukhulu yikusilela kwemali ukuze bangene ezindaweni zonke kulesisiqinti. Uthi imali abayisebenzisayo okwamanye ngephuma ezikhwameni zamalunga ale inhlanganiso kanti uthi incane kakhulu okokuthi kufananje lokuthi bazama ukugcwalisa amanzi edamu besebenzisa amankomitsho.
Sebevule ikeli ye bulenjini be Internet ethi matoposcommunitytrust.org ukuze bafinyelele loba ngubani emhlabeni jikelele ofuza ukusiza izakhamizi zeMatobo ukuze lazo ziyibone, ziyikholise intuthuko hatshi ukuhlala ziyizwela komakhelwana njengomnuko wamabhanzi.