Inhlanganiso emela abafundi eyeZinasu isisole ukubotshwa komkhokheli wayo uMnu Takudzwa Ngadziore izolo ngemva kokutshengisela ehofisini yenkampani eqhatshisa izimota eyeImpala Car Rental eHarare, yona elemota ebikwa yasetshenziswa ekuthunjweni kwesifundi uMnu Tawanda Muchehiwa.
UMuchehiwa uthunjwe koBulawayo mhlaka 30 ngenyanga edluleyo ngabantu abanakanelwa ukuthi ngabezomvikela bamhlukuluza okwensuku ezintathu kungaziwa ukuthi ungaphi lokuthi uyaphula na.
Babemethesa icala lokuqoqa ukutshengisela okwakumele kwenziwe mhlaka 31.
UNgadziore ubetshengisela esithi iImpala Car Rental kumele iveze ukuthi abasebenzisa imota eyathumba uMuchehiwa ngobani.
Inhlanganiso yeZinasu ikusolile ukubotshwa kwakhe isithi uhulumende kumele abophe abantu abathumba uMuchehiwa hatshi labo abafuna iqiniso.
Igqwetha likaNgadziore uMnu Webster Jiti uthi ulele evalelwe eHarare Police Station njalo ukhangelelwe ukumiswa emthethwandaba namuhla.
Umkhokheli wabasakhulayo kubandla leMDC Alliance uMnu Gift Ostallos Siziba laye usole ukubotshwa kukaNgadziore esithi iImpala Car Rental ilomlandu wokutshela uzulu ukuthi abasebenzisa imota yayo ukuthumba uMuchehiwa ngobani.
Asenelisanga ukukhuluma loMnu Paul Nyathi, isikhulumeli samapholisa.