amalinks wokungena

I-Bulawayo City Football Club Isungula Inhlelo Zabasakhulayo Zokuziqinisa Kwelakusasa

  • Joseph Njanji

Umqeqetshi oweqembu eleBulawayo City Football Club

Umqeqetshi weqembu le Bulawayo City uMandla Mpofu uthi usesipha ithuba abadlali abasakhulayo ukuba bahlenge leliqembu ebelisidla imbuya ngoluthi ensukwini ezedluleyo esigabeni se Castle Lager Premier Soccer League.

Iqembu le Bulawayo City selinqotshwe emidlalweni eyisikhombisa phakathi kwelitshumi lane eseliyidlale lonyaka njalo umqeqetshi walo uMpofu uthi usekubone kufanele ukuba adlalise abafana abancane abalamadlabuzane ukuze leliqembu liqale ukuthola imiklomelo.

Abadlali bami laba asebekhulile abalesipiliyoni sesidlalile sehluleka ukunqoba silabo yikho ke sesikubone kufanele njengeqembu ukuba abafana abancane laba bethole ithuba ngoba thina injongo yethu lonyaka yikuba siyale silokhu sidlala kusigaba se PSL,” kusho uMpofu.

UMpofu uphinde wathi, iqembu le Bulawayo City lihlezi endaweni yethoba munwe munye lilemiklomelo elitshumi lesikhombisa njalo ngempelaviki edluleyo litshaye ele Yadah nge 2 ka 1 enkundleni yeLuveve.

Iqembu leBulawayo City FC
Iqembu leBulawayo City FC

Inyathelo elokupha abafana abasakhulayo ithuba lisebenzile kakhulu ngoba igoli lakuqala eleqembu leli livele kumfanyana oleminyaka elitshumi lathoba minwe mbili uClive Rupiya kwathi ujaha oleminyaka engamatshumi amabili uDingani Maposa nguye odlale indima enkulu ukuze leliqembu lihlohle igoli lesibili.

Sifuna ukukwenza kahle kahle njengoba ubona ukuba uRupiya udlalile kanti loDingani laye ungenile, lomfana omncane okuthiwa nguRamson laye ubehlezi ebhentshini engumuntu ongangena. Mbijana mbijana bazabe bengena abafana sisiya phambili njengeqembu,” kusho umqeqetshi oweBulawayo City.

Ukunqoba kweqembu le Bulawayo City ngempelaviki edluleyo kuze ngemva kokuba eleBulawayo City beselidliwe kumidlalo emithathu ilandelana.

UMpofu uthi okumupha ithemba elokuba ikusasa yeqembu leBulawayo City inhle kakhulu yikuba kulabadlali abambalwa abasakhulayo abavele bekade sebedlala kusigaba sePSL ababalisa uTrevor Ndlovu kanye lo Humphrey Ncube kanye lonozinti uAron Ngwenya.

Facebook Forum

XS
SM
MD
LG