amalinks wokungena

Breaking News

Izizalwane zeZimbabwe Emazweni Zisungula Inhlelo Zokulondoloza Imali


Ezinye izizalwanze zeZimbabwe ezihlala kweleBotswana zithi sezibone kugcono ukusungula inhlelo zokulondoloza imali zisithi ezikutholayo okuncane kungaziphathisa ukuthi zisungule ibhizimusi kwelakusasa kulokuqhubeka ziqhulula umkhosi ngokuswelakala kwemisebenzi eZimbabwe.

Unkosazana Sipho Sibanda wafika kweleBotswana ngomnyaka ka2008, ephila ngokudinga imsetshenzanyana.

Sonke lesi isikhathi, kakaze eyenelisa ukuvula ibhuku lebhanga ngenxa yokungenelisi ezinye izidingo zebhanga njengo muntu waphandle kwelizwe. Kungakho yikho esebone kungcono ukungena iqembu labanye bakhe abavela eZimbabwe ukulondoloza imali.

USibanda uthi ngemsebenzi yokubamba lapha lalaphayana, imali ayihlali esambeni yikho kugcono ukubambanisa izandla labanye…

Unkosikazi Sibanda uthi babona ukuthi bangayekela ukulondoloza imali, bazazisola ngokuthi kanti babevele belandeni eBotswana ngoba bengaphindela ekhaya belengise izandla.

Omunye wakhe, uNolizwe Khumalo uthi kumqoka ukuthi ekuqaleni komnyaka beziqoqe beqala ukuhlanganisa okuncane abakutholayo.

UJames Ndlovu, yena obona ngezomnotho, uyancoma lelinyathela esithi yindlela eqondileyo yokulondoloza imali.

Ngokuwa kwamandla eRand lakwele South Africa abanengi sebengabathi kungcono ukwemukela iPula leBotswana ngoba isisindo salo silokhu singaneno.

Iqembu leli lithi lasungula lolu hlelo ngemva kokubona abanye bebuyela ekhaya bedatshukelwe, bengela okukhomba ukuthi kade bephanda eBotswana.

Inengi elingena eBotswana okungekho emthethweni liyenelisa ukuyenza imali yokuziphilisa kodwa ngenxa yempilo yokudlala umacatshelana, ikakhulu labomthetho, bayehluleka ukuziqoqa besungule inhlelo ezingabanceda.

XS
SM
MD
LG