amalinks wokungena

Inkampani yeNRZ Idinga i$40 Million Yokuvuselela Imisebenzi Eyenzayo


lnkampani kaloliwe iNational Railways of Zimbabwe (NRZ) ngoLwesibili yenze umhlangano koBulawayo wokukhulumisana labatshali bemali, ugatsha lukahulumende lwezemali, inhlanganiso zeNRZ zezisebenzi kanye lenkampani ebabonisa ngokusebenza iDelloite and Touche ngemizamo yokuvuselela ukusebenza kwayo.

Inkampani le idinga izigidi ezingamakhulu amane - $40 million - nomanje ilesikwelede esedlula izigidi ezingamatshumi ayisificaminwe mibili lambili - US$92 million - zeholo kungabalwa ezinye eziyimfihlo.

Umgcinisihlalo weNRZ Board, uMnu. Larry Mavima, uthe yebo balesikwelede seholo lezisebenzi esedlula iUS$92 million kodwa badinga inkampani eqotho ezatshala imali ivuselele ukusebenza kukaloliwe layo ithole inzuzo hatshi ukuthi kubelokungasebenzalini kahle.

Uthe ingwalo zokubhalela ukufuna ukutshala imali kunkampani kaloliwe kuzakuma mhlazine ngoNtulikazi lonyaka njalo kabafuni buqili kumbe ukufumbathiswa ukuze ukuvuselelwa kweNRZ kulethe impumela kuyo lakumatshala imali.

Amankampani adlula amatshumi amahlanu asuka China lakuleli afuna ukutshala imali ekuvuselelweni kweNRZ angenelumhlangano njalo athethe ingwalo zokusungula ukufuna ukutshala imali abakhangelelwe ukuziphendukisa kuviki yakuqala KaNtulikazi.

UMnunzana Mbuzo Fuzwayo olwela amalungelo oluntu, uthe uyathandabuza ukuba ukhona umuntu ongafuna ukutshala imali eZimbabwe ngendlela ilizwe elimi ngakhona.

Isakhamuzi sakoBulawayo, uMnu. Alfred Ncube, uvumelane loFuzwayo esithi udaba lweNRZ lubuhlungu njalo kulengozi yokuthi akulamehluko kuhulumende lebanlda elibusayo ngakho akusoke kwabalula ukuthola umuntu oqotho ongatshala imali.
Ethi kakubelomgoqo osobala phakathi kokusebenza kwamankampani lebandla
leZanu-PF ethi ukuwa kweNRZ kubangelwe libandla leZanu-PF.

Uthe loZupco laye uwile ngoba ibandla elibusayo alibhadali lisebenzisa maha izitsha zelizwe ezimele zilethe imali.

UMongameli weNRZ Artisan Union, uMnunzana Edmore Africa laye uthe njengezisebenzi zeNRZ, kuyabajabulisa ukuba uHulumende wabapha imvumo yokudinga amankamapani azatshala imali ngemizamo yokuvuselela ukusebenza kwenkamapni ethi ukhulekela ukuba kungafani lokwenzakala eNkabazwe eZISCO.

Inkampani yeNRZ idinga imali yokuvuselela kwemitshina ehlukene, incingo zokukhulumisana lezokuqondisa ukuhamba kwezitimela kunye lemitshina yebulenjini, njalo inkampani ezatshala imali ayisoze yabanjwa ngamandla ekukhupheni imali kodwa izazitsholo ukuba itshala kanjani.

Imitshina eminengi yeNRZ ayisebenzi ifile njalo eminye isimidala ayisahambelani lokusebenza kwalezi insuku.

Facebook Forum

XS
SM
MD
LG