amalinks wokungena

Breaking News

Inkampani yeZimpapers Ithola Imvumo Yokusakaza Kumabonakude


FILE: Abantu babukela owayengumongameli uMnu. Robert Mugabe ekhuluma kumabona kude weZBC.
FILE: Abantu babukela owayengumongameli uMnu. Robert Mugabe ekhuluma kumabona kude weZBC.

Uzulu uthi udaniswe yikunikwa icence likamabona kude kwenkampani yeZimbabwe Newspapers (Zimpapers).

Uthi kuyamangalisa ukuthi amankampani adlelana lebandla elibusayo eleZanu PF yiwo aphiwa amacence okwethulela uzulu imbiko etshiyeneyo.

Abanengi bathi loba nje kuyinto enhle ukuthi uzulu weZimbabwe athole ukukhetha afisa ukukubukela kubomabonakude, kumele kwenziwe ngendlela ezabalethela inhlelo ezinengi njalo ezilomehluko ngoba sebediniwe ukubukela ezombusazwe.

Inkampani edinda amaphephandaba eyeZimpapers ngeyesibili ngemva kweye Zimbabwe Broadcasting Corporation (ZBC) ukuthola imvumo yokusakaza kumabonakude.

Lokhu wosokwenze kwaba lokukhonona okukhulu kuzulu okhangelele ukuvota lonyaka.

UMnu. Thamsanqa Mhepoh, ongumqeqeshi wezifundo zobuntathelizindaba, usola kakhulu lelinyathelo esithi iZimbabwe isalinde ukuthi amacence anje aphiwe abasakaza bezimele bodwa ukuze uzulu athole ulwazi olungeyameli kuZanuPF kokuphela.

Esinye isakhamuzi sako Bulawayo, UNomathemba Zondo, uthi okwenziwe yiBroadcasting Authority of Zimbabwe kuyindlela yokubamba nje uzulu amehlo ngokwenza engani bayapha imvumo kuye wonke umuntu kukanti bephanana nje bodwa.

Umqondisi weZimpapers, uPikirayi Deketeke, uthi besekumele inkampani le ikhule ngokugcweleyo ngoba ukuguquka kwezikhathi sekusenza uzulu athole ulwazi lwakhe ngokwenzakala ebulenjini be internet osekusehlisa ukuthengwa kwamaphephandaba abo.

Ingcwethi kwezenotho, uMnu. Mlamuli Hadebe, uthe lobanje abantu abanengi bengalamukeli leli nyathelo likahulumende, iZimpapers yinkampani ekhangelele ukusebenzela inzuzo ngakho-ke kumele iphume lezinqumo eziletha inzuzo yokuthi iqhubeke isebenza.

Inengi libona lelinyathelo elithethwe nguhulumende ukupha iZimpapers icence lokusakaza kumabonakude njengendlela yokuqhubekisa ukwethulwa kwemibono yakhe ngemva kokunanzelela ukuthi ukuthengisa amaphephandaba akusalethi nzunzo lomsakazo weZBC lawo awusela sithunzi ngoba laye ulengxenye ekutshaleni imali kuyo eyamashares.

Udaba Esilethulelwe NguGibson Bhebhe
please wait

No media source currently available

0:00 0:04:01 0:00

XS
SM
MD
LG