Esinye seziphathamandla sebutho uBrigadier General Douglas Nyikayaramba uthi ibutho lifuna ukhetho lwenziwe lonyaka, njalo uthi uMongameli Mugabe kumele abuse aze ayekufa.
Ekhuluma lephephandaba leZimbabwe Independent kungxoxo ephume ngoLwesihlanu uNyikayaramba uthi njalo ulilunga lebandla leZanu PF, ngalokhu, uthe ufuna uMugabe abuse kuze kube naphakade.
Wengeze wathi ibutho lifuna ukuba uhulumende womanyano aphele ngoba lincitshwa imali yokuzinakekela ngumphathintambo wezemali uMnu Tendai Biti, yena olilunga leMDC ekhokhelwa nguMnu Morgan Tsvangirai.
Uthe njalo akala kuthandabuza ukubana iZanu PF izanqoba kukhetho oluzayo, wathi inganqotshwa inkokheli yalelibandla ivume ukusuka embusweni, uzatshiya isikhundla sakhe ngoba engeke amela ukubuswa ngabantu beMDC.
Amacele womabili eMDC asole uNyikayaramba ngamazwi akhe esithi kamelanga angenele kudaba lwezombusazwe.
Usikomitshi wamapholisa uMnu Agustine Chihuri laye ngeviki edluleyo uhaye uMongameli Mugabe esithi akulamuntu ongafa abusa njengaye. IMDC ithe inkokheli yezomvikela kumele isuswe ezikhundleni ngoba isekela iZanu PF okusegcekeni.
Ingcwethi kwezombusazwe uMnu Bhekilizwe Ndlovu utshele uNtungamili Nkomo weStudio 7 ukuthi alihlazo elikhulu amazwi kaNyikayaramba.
