Umfanekiso kaMnu Emmerson Mnangagwa enatha ngenkomitsho ebhalwe ukuthi “Am the Boss” (Yimi umkhokheli) sucunule amalunga eZanu PF akucele leG40 agoqela uMnu Jonathan Moyo yena othi lokhu kuveza sobala ukuthi uMnangagwa ufuna isikhundla sikaMongameli Robert Mugabe.
UMnu Moyo utshengise umfanekiso lo ekhasini lakhe lenkundla yeTwitter njalo uthe uqale wadindwa liphephandaba leDaily News.
Kumfanekiso lo, uMnanagwa ubonakala enatha ngenkomitsho le ehlezi esofeni ebobotheka elabantu ababili abagoqela ilunga leZanu PF elingusomabhizimusi uMnu Energy Mutodi.
Etafuneli phambi kwabo bekulamambodlela otshwala. Icele leG40 lihlezi lidlephala lelisekela uMnu Mnangagwa eleTeam Lacoste ebanga isikhundla sikaMugabe.
Lanxa uMongameli Mugabe eseke wakhuza kanengi-nengi, amacele la akhanya engamlaleli ndoba eqhubeka edlephana emphakathini.
Ukuhlaziya loludaba sixhume ingcwethi kwezombusazwe uMnu Brilliant Mhlanga yena othi ukulwisana lokhu kulakho ukuphela nxa ibandla leZanu PF selibhekane lamabandla aphikisayo kukhetho luka2018.
