amalinks wokungena

Breaking News

Inkulungwane leNkulungwanwe Zabantu Zivalelisana loNkosikazi Vimbai Tsvangirayi Java


Inkulungwane lenkulungwane zabantu esililweni sikaNkosikazi Vimbai Tsvangirayi Java

Inkulungwane lenkulungwane zabantu zibuthene enkundleni ye City Sports Center, eHarare zivalelisana lomuyi uNkosikazi Vimbai Tsvangirayi Java, yena obhubhe ngoMvulo ngamanxeba wokulimalela engozini yemota eyenzakale ngenyanga edluleyo yena labanye bakhe bevela koBulawayo .

Emfeni kaNksosikazi Vimbai Tsvangirai Java
Emfeni kaNksosikazi Vimbai Tsvangirai Java

Abasekeli bebandla le MDC babuye ngobunengi bezovalelisana lomuyi embuthanweni obugoqela iziphathamandla ezinjengomkhokheli walelo bandla, uMnu. Nelson Chamisa, abasekeli bakhe oMnu. Welshman Ncube, loTendai Biti kanye loMayor we Harare, uMnu. Hebert Gomba.

Umkhokheli welinye lamacele aweMDC uNkosazana Thokozani Khuphe kanye lomlawuli wedale le phalamende, owebandla leZanu PF, uAdvocate Jacob Mudenda lezinye inkokheli zokholo kanye lengatsha ezitshiyeneyo elizweni lazo bezikhona emfeni.

Umkhokheli weMDC embuthanweni wokuvalelisa uNkosikazi Vimbai Tsvnagirayi Java
Umkhokheli weMDC embuthanweni wokuvalelisa uNkosikazi Vimbai Tsvnagirayi Java

Isimo enkundleni besiveza ukudana okukhulu, isikhulumi sinye ngasinye siveza ubuhlungu bokulahlekelwa yintombi ekade ithembisa ukuthi izakuba lelakusasa elibukekayo kwezombusazwe ngoba ubesanda kukhethwa ukuba ngenye yenkokhethi kuhlangothi lwabesifazane kubandla le MDC kukhetho lweCongress olwenziwe kumaviki amalutshwana adluleyo.

Unobhala wogatsha lwabatsha kubandla le MDC uOstallos Siziba uvalelise umuyi esithi bazaqubekela phambili ngephupho lakhe lokulwela intsha elizweni.

“Sihlangana lemuli eyako Vimbai Tsvangirai Java, sikhalela umphefumulo ka Honorable Java sisithi lala ngokuthula, ulwe ukulwa okulungileyo, thina njengabatsha sizaqedisa uhambo lwethu ukuze ukukhululeka kwabantu beZimbabwe kubuye kithi. Sibonga abakhonzi bonke labenhlanganiso ezitshiyeneyo ukuthi sikhale nje ukuhamba komunye wethu”

Emngcwabeni kaNkosikazi Vimbai Tsvangirayi Java
Emngcwabeni kaNkosikazi Vimbai Tsvangirayi Java

Uqhubeke wathi ibandla leMDC lilahlekelwe ngumuntu owayelesipho sokududuza lokunikaqinisa abayabe behlukuluziwe besesibhedlela loba emajele bebotshelwe ezombusazwe.

“Ubengumuntu othanda ukubambanisa abantu ikakhulu kithi abatsha uyakwazi ukuthi amandla manengi kakhulu so kufuna umuntu okwazi ukulimisa so uVimbai ubengumuntu okade ebambanisa abantu njalo ubengumuntu okade enceda abantu ezikhathini zokuhlupheka ikakhulu ngendaba zomthandazo njalo lokunceda ke abatsha abethu abahlukuluzwa yiZanu esiyithi yi Socio-Psycho support ukuze abantu bebekwazi ukubuyela ke esimeni sobuntu besibhidlizwe yiZANU pf. So ubengumuntu othembekileyo njalo engaphiwa umsebenzi ubekwazi ukuthi kummele awenze ngendlela epheleleyo”

Unkosazana Thokozani Khuphe emngcwabeni kaNkosikazi Vimbai Tsvangirayi Java
Unkosazana Thokozani Khuphe emngcwabeni kaNkosikazi Vimbai Tsvangirayi Java

Umsekeli kamkhokheli weMDC uMnumzana Welshman Ncube uchaze umuyi njengentombi eyayizithobile, ikhuthele njalo iqakathekisa uNkulunkulu. Uqhubeke ethi umuyi akazange wafuna ukusebenzisa ibizo likayise yena owayedumile njengomkhokheli wakuqala webandla le MDC, ekhomba ukuthi uVimbai wazicentela indlela yakhe yedwa ngokukhuthala kwakhe.

“Okuqakathekileyo yikuthi namhlanje besithakazelela impilo kaVimbai Tsvangirai Java, intombi ethethwe masinyane, engakaqalisi lokusebenza umsebenzi akade esezikhethele wona. Esikwaziyo yikuthi loba wayengumntwana kapresident uTsvangirai, yena waye hlala engumuntu ozehlisileyo umuntu ozibeka phansi, olenhlonipho. Wawungeke wabakwazi ukuthi lizibulo lika Tsvangirai ngendlela akade eziphethe ngayo njalo engumuntu olothando, engumuntu osebenza lawonke umuntu ikakhulu omama. Wayehlala evule iminyango ebancedisa ekhuleka labo, abafuna uncedo lwempahla. Silahlekelwe kakhulu ikakhulu iConstituency yakhe, kade esaqalisa umsebenzi nanko sethethwe, kulusizi kakhulu.”

Kunjalo nje, inkokheli yeMDC ithi ikhathazekile kakhulu ngokuziphatha kwabanye abasekeli balelo bandla abathethise inkokheli zamanye amabandla awezombusazwe ezikade zizoduduza imuli kamuyi.

Emngcwabeni kaNkosikazi Vimbai Tsvangirayi Java
Emngcwabeni kaNkosikazi Vimbai Tsvangirayi Java

Kube lokukhonona okukhulu lapho kunanzwa unkosikazi Thokozani Khuphe owebandla le MDC-T kanye loAdvocate Jacob Mudenda ongumlawuli wedale lephalamende oze emmele ibandla elibusayo ele ZANU PF.

UMudenda wehluleke ukuqubeka esethula umbiko wenduduzo ngemva kokuba abasekeli beMDC beqalise umsindo wokumhoza kwaze kwalamula uChamisa osukume wakhuza abakade bebanga umsindo, wacela uxolo ukuze uMudenda aqhubekele phambili.

UNcube uthi kulusizi okwenziwe ngabasekeli bebandla lakhe ngoba kungasilo siko lesintu ukuphatha ngaleyo ndlela abayabe beze ukududuza abalahlekelweyo kodwa ubuye wathi lokhu kukhomba ukuthukuthela kukazulu ngesimo esibi elizweni esilethwa libandla le ZANU pf.

“Kuqakathekile ukuthi sihloniphe umuyi, ukuthi sihloniphe inkokheli ezikhona, sihloniphe labo ababuye ukuzekhala lathi njenge muli ye MDC. Kuyenzakala njengesikubonileyo ukuthi ngenxa yokuthi abantu elizweni lapha babuhlungu kakhulu, abantu abayadubeka kusuke bangenelwe ngumoya wokuthi bathethise benze into okungamelanga zenziwe, akumelanga kube njalo njengokutshiwo ngupresident uNelson Chamisa, ukuthi nxa kuzindawo ezinje asike sibambe inhliziyo, silume imilomo yangaphansi siqinisele loba sisizwa ukuthi siyahlabeka, yikho okuqakathekileyo, sikhumbuzane ngakho okwenzela ukuthi kungabi lengxabangxoza esiyibona ikhona kwesinye isikhathi. Imbeko kumele sibe loayo kuqakathekile.”

U-Nkosikazi Vimbai Tsvangirai Java
U-Nkosikazi Vimbai Tsvangirai Java

UNkosikazi Tsvangirayi Java obhubhe ekuqaliseni kwaliviki ngamanxeba awathole engozini yomgwaqo yena labanye bakhe bevela koBulawayo ngenyanga edluleyo, ubeyindodana kamuyi owaba ngumkhokheli wakuqala webandla eliphikisayo eleMDC. Umuyi obendele koJava ubekwe emathuneni aweGlen Forest eHarare namhlanje.

Udaba lokungcwatshwa kukaNkodikasi Vimbai Tsvangirayi Java siluphiwa nguGibson Bhebhe
please wait

No media source currently available

0:00 0:05:51 0:00

Facebook Forum

XS
SM
MD
LG