Izakhamizi zeHarare,zibuthane eAfrica Unity Square, ukusekela inyathelo lamalunga edale lephalamende ekusukumiseni udaba lokususwa kukamongameli Robert Mugabe esikhundleni.
Ababuthene kulendawo bathi bazaqhubeka belapho aze asuke esikhundleni sokuba ngumongameli welizwe.
Bekuyinjabulo kulabo ababuthene e Africa Unity Square, ebucwadlana lalapho okule dale lephalamende.
Le yindawo yinye lapho owanyamalalayo, u Itai Dzamara labanye bakhe benhlanganiso ye Occupy Africa Square, babeqhuba imikhankaso minye, ukukhankasela ukususwa kukamongameli Mugabe esikhundleni, embeka umlandu wokuba esekhulile njalo esesehluleka ukuqhuba umsebenzi.
Bathi benza lokho ukusekelana lalokho okusungulwe ngabakubutho, osekusiyasukunyiswa edale lephalamende ukuba asuswe esikhundleni uMugabe adedele abanye.
Umnumzana Gift Sibindi, owaziwa njalo ngelokuthi Joel Chakanyuka, ulandise ngokumenze wazamanyana labanye kulombuthano.
Lanxa engala eqinisa ikhanda uMugabe esala ukusuka esikhundleni, u Sibindi uthi uzovuma kuphela.
Uthi esekuzwisisa lokho okwakukhankasela ngu Itai Dzamara, ongaziwayo lapho akhona, esithi umongameli Mugabe asuke esikhundleni kodwa uzulu engamnaki.
Umnumzana Lucky Ndiweni ophila ngokuthengisa, ulandisa ngokumenze wazaphatheka laye kulomkhosi.
Ubuhlungu u Ndiweni othi uphila ngokuthengisa nje,ngoba ingekho enye indlela angaphila ngayo.
Umnumzana Benard Sibanda ngubaba oleminyaka engamatshumi amane yokuzalwa njalo eyisakhamuzi se Old Tafara. Yenake uthi akasamfuni uMugabe esikhundleni ngakho kumele asuke.
Ukhala ngomonakalo, uSibanda,obangelwe ngumbuso kamongameli Mugabe athi kuzophazamisa ikusasa yezizukulwane ze Zimbabwe.
Abezokholo labo beke babakhona kulomkhosi, ukusebenzisa lelithuba ukuthandazela ilizwe, bekhala kumdali ukuba akhokhele, kufezeke lokho abakufisayo, ukusuka kukaMugabe esikhundleni.
Kuyajatshulwa kusinwa kulomkhosi abantu belindele ukuzwa impumela yokusukunyiswa kodaba lokususwa esikhundleni, kukamongameli Mugabe, okuqhutshwa ngamalunga edale lephalamende.
