amalinks wokungena

Breaking News

Kwenziwa Umbukiso Wentathelizindaba Zesifazana Ezithatha Imifanekiso


Angela Jim Umqondisi we ZAFP inhlanganiso yentathelizindaba zesifazana ezithatha imifanekiso

Intathelizindaba zesifazane ezithatha imifanekiso, ezisebenza phansi kwenhlanganiso ye Zimbabwe Association of Female Photographers ziveza ukuba indlela yokuthatha imifanekiso ngenye yendlela eziphathisa ukuveza indaba eziphathelane laboesifazane, ezingaqakathekiswa zintatheli zesilisa.

Intathelizindaba lezi zithi lindlela izaphathisa ekwethuleni indaba ngemifanekiso, engasetshenziswa ukuveza inkinga abesifazane babhekane lazo kanye lendlela abahlukuluzwa ngayo eZimbabwe, ezingatholiswa thuba kumaphephandaba lasemisakazweni.

Lezintatheli ziveze lokhu emkhosini wokuphawulwa kombukiso, wezithombe, eziveza ubunzima abesifazane ababhekana labo kanye lendlela abahlukuluzwa ngayo sikhathi sonke, kodwa kungakhulunywa ngakho ezindabeni.

Omunye wabaphatheke kulomkhosi owathatha izithombe zabesifazane eMutare unkosazana Mana Meadows, eveza ubunzima ababhekana labo nsuku zonke, utshele intathelizindaba ukuba le ngenye indlela yokulandisa okwehlela abesifazane laba sikhathi sonke, kodwa kungakhulunywa ngakho, abezindaba bengakuqakathekisi.

Abaze kulombukiso baveze ukuba ubavule amehlo ngoba sebekunanzelele ukuba zinengi indaba abekade bengaziqakathekisi, eziqodane labesifazane ikakhulu indlela abahlukuluzwa ngayo kodwa engekho ozihluphayo ukukhuluma ngazo.

Unkosazana Yolanda Ndlovu ngomunye obekulombukiso wangoLwesine. UMaNdlovu uthi usizakele ngokuza kwakhe ngoba esefunde okunengi abekade engakunazeleli ukuba kuyindlela yokuhlukuluzwa kowesifazane, kuthiwa yiyona nhlalayenza.

Bayisitshiyagalolunye abaphatheke kulombukiso njalo kuzintathelizindaba ezithatha imifanekiso. Laba babalisa uMana Meadows, Davina Jogi, Angela Jim, Cynthia Matonhodze, Annie Mpalume, Katy Lannas, Kresia Mukwazhi, Lucy Broderick kanye loNyaradzo Dhliwayo.

Umbukiso we Zimbabwe Association of Female Photographers (ZAF), oqhutshwe ngosizo lwemali evele kwabe HIVOS lehofisi yommeli we Netherlands eZimbabwe, wenziwe phansi kwesihloko esithi, “Survivors and Activists Project”.

XS
SM
MD
LG