amalinks wokungena

Breaking News

Intathelizindaba Zizondiswa Ngokwethulwa Ngumcebisi kaMnangagwa uChris Mutsvangwa


UMnu. Chris Mutsvangwa.

Annastacia Ndlovu

Umcebisi omkhulu kaMongameli Emmerson Dambudzo Mnangagwa, uAmbassador Christopher Mutsvangwa, uthi lanxa ekholwa ukuba kumele intathelizindaba zisebenze zikhululekile lazo kumele zilwele inguquko kwezemithetho elawula loluhlangothi elizweni leZimbabwe.

UMutsvangwa uveze njalo ukuba uMongameli Mnangagwa uhlezi esitsho ukuba ufuna luqhutshwe ngendlela ukhetho lwalonyaka lube ngolwamukelwa nguye wonke umuntu njalo uzimisele ukubona uhlangothi lwabathapha izindaba lusebenza lukhululekile.

Utsho lamazwi esethula umbiko wakhe phezu kwezokuguqulwa kwemithetho elawula ezokuthapha izindaba elizweni.

Ubengumhlonitshwa emhlanganweni wokudla kwekuseni owenzelwe eHoliday Inn uqoqwe yinhlanganiso yabonozindaba eye MISA Zimbabwe, ukwandulela usuku lokunanza ukusebenza kwentathelizindaba zikhululekile emhlabeni wonke jikelele mhla zintathu ngoNkwenkwezi.

Kodwa iziphathamandla zenhlanganiso ezisebenzisana lentathelizindaba zitshengise ukukhathazeka lokungavumelani lenkulumo kaMutsvangwa.

Umqondisi weVoluntary Media Council of Zimbabwe, uMnu. loughty Dube, uthi iyadanisa linkulumo.

UDube uthi kunengi abakuloluhlangothi asebekwenzile ukubonisa uhulumende ukuqakatheka kokuba iguqulwe imithetho engumgoqo kuntathelizindaba lapho zisebenza.

Okudanisayo njalo uDube uthi yinkulumo ephuma emlonyeni womuntu okade ekhangelwa njengozwisisa indlela loluhlangothi lusebenza ngayo nxa kukhangelwa imbali yakhe ukuba wasukela kude ngomsebenzi wokwethulwa kwemibiko kusukela besempini.

Lokhu kusekelwe ngesinye seziphathamandla ezibona ngezokukhulumisana lozulu enhlanganisweni ye Young Journalists Association, uMnu. Leopold Munhende, laye oyintathelizindaba.

Uthi kayimjabulisi linkulumo kaMutsvangwa.

Abenhlanganiso ezisebenzisana lentathelizindaba bathi eminye yemithetho engumgoqo ekusebenzeni kwazo, okumele uhulumende ayiguqule ngebalisa owe Public Order Security Act (POSA), Access to Information and Protection of Privacy Act (AIPPA) lowe Broadcasting Authority of Zimbabwe (BAZ).

Umhlangano wangoLwesithathu ungomunye yemikhosi eqoqwe ngabe MISA Zimbabwe, ngesikhathi kulungiselelwa usuku oluqakathekisa imisebenzi yentathelizindaba emhlabeni jikelele olwe World Press Freedom Day.

Isihloko somkhosi walonyaka sithi ‘Media Reforms now: Free and accountable Media Key to Elections’.

Udaba Esilethulelwe NguMavis Gama
please wait

No media source currently available

0:00 0:07:28 0:00

Intathelizindaba lokhe zikhonona ngokuhlukuluzwa, ukubotshwa, ukuvinjwa ukungena kweminye imihlangano, ukusebenza ngaphansi kwemithetho elongcindezelo kanye lokuvinjwa kwamankampani afuna ukuqala amabhizimusi okwethulwa kwezindaba eZimbabwe.

UNkosikazi Fortune Moyo, intathelizindaba esebenzela koBulawayo, uthi ukuhlukuluzwa lokhe kukhona ngaphansi kombuso kaMnangagwa ngoba bahlangane lakho ngelanga evula umbukiso wamabhizimusi lokuthengiselanao owe Zimbabwe International Trade Fair ngeviki ephelileyo.

UMnu. Zenzele Ndebele, okubhizimusi lokusakaza ebulenjini, uvumelane laye esithi kuyasebenzeka ngcono uma kuqathaniswa layizolo kodwa kusase lomsebenzi ngoba uhulumende omutsha lokhe engafuni ukukhulula imisakazo ezimeleyo.

Inhlanganiso elwela amalungelo oluntu, eye Crisis in Zimbabwe Coalition, iyamsola uhulumende kaMnangagwa.

Ithi kehlukananga lombuso kaMnu. Robert Mugabe ngoba kuviki ephelileyo kulentathelizindaba ezibotshiweyo.

uMqondisi wenhlanganiso le, uMnu. Thulani Mswelanto uthi akulanguquko phakathi kuka Mugabe loMnangagwa ngoba amaphephandaba lemisakazo kahulumende lokhe ekhanya esekela ibandla leZanu PF.

Udaba Esilethulelwe NguAnnastacia Ndlovu
please wait

No media source currently available

0:00 0:02:29 0:00

Facebook Forum

XS
SM
MD
LG