amalinks wokungena

Breaking News

Intsha Ikhuthazwa Ukuthi Ilole Amaqhinga Okuthuthukisa Impilo


Abasakhulayo
Abasakhulayo

Usomabhizimusi weZimbabwe ohlala e South Africa, uMnu. Justice Maphosa usekhuthaze abatsha beZimbabwe ukuthi basukume balole amaqhinga okuvuselela umnotho hatshi ukuchitha isikhathi bekhala ngokuwa kwawo. UMaphosa utsho lokhu ngesikhathi ekhuluma labatsha enkonzweni abemenywe kuyo ngempelaviki eJohannesburg enkulumeni yokunanza ilanga labatsha u 16 Nhlangula.

Esethula inkulumo yakhe kwabatsha beZimbabwe lamanye amazwe atshiyeneyo ebandleni le Harvest House International Church eJohannesburg, umnumnzana Maphosa uthe kulusizi ukuthi inengi lentsha yalamhlanje sekungamavila acabanga ukuthi kufanele benzelwe phose into yonke empilweni.

UMaphosa uthi ukuze, intsha yalamhlanje ihlakaniphe njalo isebenze nzima, kuyadingeka ukuthi bonke abakhulayo badlule ekuqeqetshweni kwesibutho okweminyaka emine ukuze bafunde ukumelana lobunzima bempilo.

“Abatsha mabayeke ukuyilinda bahambe bayoyizingela. Awulindi ispringbok or impala ize kuwe, inyama uyilanda ehlathini. Ngibona kuTV kulabo 17 yee sifuna indlu, sifuna indlu! Uyifuna kubani indlu?” kubuza uMaphosa.

UMaphosa ufike kweleSouth Africa esasengumfanyana, lapho afike wahlala lokulala ezitaladeni okwenyanga ezintathu. Lamhlanje usengusomabhizimusi odume kakhulu kweleSouth Africa kanti njalo uselamankampani alitshumi lesikhombisa.

Ukhuthaze abatsha laba ukuthi bengafuqelwa phansi yibuyanga njalo bengagijimeli intokozo kodwa basebenze nzima ukuthuthukisa impilo zabo lelizwe.

Uthike ngalesi isikhathi intsha yeAfrica jikelele inanza inyanga yabatsha eyethulelwe isikhumbuzo sokubulawa kwabatsha ngumbuso wamabhunu kweleSouth Africa mhlaka 16 Nhlangula 1976, abatsha kufanele bahlanganise amakhanda behlela abangakwenzela amazwe abo lezwekazi leAfrica.

“Mina uJune 16 yisikhathi sokuthi ngabe manje sibiza imbizo yokuthi sifuna ukwakha ifoni. Nayi ingculaza iyasibulala namanje. Why singathandi thina njengabantu abamnyama sithi sifuna ukuyilwisa lento iqede abomama bethu. Sibize amaNigerian aze lapha. Sibize amaZimbabwean eze la. Sihlanganise amakhanda sonke siyisizwe esimnyama sikwazi ukuphuma lekhambi eliyi 1,” kutsho uMaphosa.

Inengi lentsha ebelikulo umbuthano lethule ukujabula okukhulu laveza ukukhuthazeka ngembali kamnumnzana Maphosa owaqala ngokulala emabholohweni, kanti lamhlanje osengumuntu olendizamtshina yakhe lemuli yakhe nje kuphela.

Omutsha weZimbabwe uEvans Mahopolo, uthi njengabatsha abadabuka elizweni alilobunzima sebethole ithemba lokuthi asikho isimo okufanele sibenqabele ekufezeni amaphupho abo empilo.

“After ngimuzwa ekhuluma ngiyakholwa ukuthi its possible ukuthi name ngibe ngumuntu ofana naye. Unginikezile mpela ngingathi amadlabuzane ukuba nami ngikhone ukuba ngumuntu onesithunzi ebantwini. Umuntu okhona ukusebenzela umphakathi. Umuntu okhona ukuhlanyela back to the community,” kutsho uMahopolo.

Embuthanweni lo umnumnzana Maphosa uthembise ukuthi inkampani yakhe izakupha abatsha abalitshumi ithuba lokufundela izifundo zemisebenzi etshiyeneyo wathembisa ukuthi abenze kuhle uzabacandela imisebenzi emankampanini akhe.

please wait

No media source currently available

0:00 0:02:55 0:00

XS
SM
MD
LG