amalinks wokungena

Breaking News

Inzalo yeZimbabwe eSouth Africa Ithi Ukubotshwa Kuka Duduzane Zuma Akube Yisibonelo kuMnangagwa


Duduzane Zuma

Izizalwane zeZimbabwe kweleSouth Africa sezikhuthaze umongameli Emmerson Mnangagwa ukuthi angasoli inkohlakalo ngomlomo kuphela kodwa kubotshwe bonke abasezikhundleni eziphezulu abalamacala enkohlakalo.

Linkuthazo ilandela ukubotshwa lokumiswa phambi komthethwandaba kukaDuduzane Zuma indodana yobengumongameli umnumnzana Jacob Zuma.

Izizalwane zeZimbabwe zithi ukumiswa kukamnumnzana Duduzane Zuma emthethwandaba yisifundo esikhulu okufuze sifundwe nguhulumende weZimbabwe. Umnumnzana Zuma ungene emthethwandaba we Johannesburg Specilized Commercial Crimes Court ebotshwe ngamaketane enyaweni.

Yenake ubezama ukuhlekelela ngesikhathi intatheli zibangisana ukuthwebula isithombe sakhe kodwa kukhanya ukuthi ukubotshwa kwakhe kumhlukumezile.

Igqwetha lakhe litshele abezindaba ukuthi umnumnzana Zuma wetheswa icala lenkohlakalo.

Emthethwandaba umtshutshisi utshele uMantshi ukuthi umbuso ucela ukuthi leli cala lidluliselwe phambili njengoba kusasekunengi abafuna ukukudingisisa ngaleli cala.

Isizalwane seZimbabwe umnumnzana Mcasiseli Gwaza uthi umtshayela ihlombe uhulumende kaMongameli Ramaphosa ngendlela alwisa ngayo inkohlakalo.

“Lokho lathi siyafisa ukuthi ngabe kuyenzakala kithi, abantu bonke akade bekuhulumeni okhitshwe ngoNovember, kube nabo bayabanjwa bashushiswe kuzokwazu ukuthinje umthetho ukwazi uku applaya kumuntu wonke ngendlela elinganayo kungabinje yikuthi abanye abathile bayayekwa,” kutsho uGwaza.

Lelicala liphathelene lendima eyadlalwa ngumnumnzana Duduzane Zuma ngo 2015, ngesikhathi yena labosoma bhizimusi bemuli yamaNdiya enothe kakhulukazi eyakoGupta, bezama ukupha imali yesifumbathiso kulowo owayengumsekeli kamphathintambo wogatsha lwezemali umnumnzana Mcebisi Jonas.

Kubikwa babemthembise ama randi ayizigidi ezingamakhulu ayisithupha (R600 million) nxa engathatha isikhundla sikaMphathintambo wogatsha lwezemali abesethatha izinqumo ezizasekela amabhizimusi emuli yakoGupta.

Kodwake isizalwane seZimbabwe umnumnzana Promise Sibanda uthi usizi yikuthi eZimbabwe le yinto engangeke yenzeke.

“I government kaRamaphosa Ma siyibona siyabona ukuthi hayi, ingene ngonyawo olutsha lokudealer le corruption. But ngoba vele u ED eyi corruption yena ngokwakhe, eZim yikuthinje kuvotwe out igovernment yonale ekaED ngoba ma se si dealer le corruption siyabe siqala ngaye u ED silokhu sisehla kubangani bakhe,” kutsho Sibanda.

Le yinto egcizelelwa ngesinye isizalwane seZimbabwe unkosazana Magugu Nyathi yena othi isimanga eZimbabwe yikuthi kwathi ngesikhathi kuhluthulwa umbuso kwathiwa kuzingelwa amasela lezigebenga kodwa lalamhlanje bonke bakhomba ngophakathi.

“Ubesithembisile ukuthi uzolwisana lobukhohlakali kodwa kuze kuzofika khathesi asikaboni utshintshonje. Bonke abantu akade kuthiwa yizigebengu ezisekela umongameli welizwe sibabona lokhe bezijabulelanje bengaphandle. Yinto edanisayo kakhulu leyo esifisa ukuthi ngabe iyaguquka,” kutsho uNyathi.

Umnumnzana Mlungisi Tshabalala yena ukhuthaza umongameli Emmerson Mnangagwa ukuthi ekele ukukhuluma ngomlomo kuphela ngenkohlakalo kodwa kubonakale kubotshwa abasezikhundleni eziphezulu kuhulumende okwazakalayo ukuthi bayaphatheka kunkohlakalo eyabhidliza umnotho welizwe.

“Sithanda ukuthi sikubone kuPresident waseZimbabwe uMnangagwa ekwenza lokhu kulabo abalamacala kungakhethelekile ukuthi basehlangothini luphi. Nxa umuntu wonke olecala loba eku opposition, loba eku Lacoste ababoshwe bonke abantu bevele eCourt,” kutsho uTshabalala

Umnumnzana Duduzane Zuma uthathelwe iphasipoti yakhe, walaywa ukuthi ahlawule imali yesibambiso engamarandi azinkulungwane ezilikhulu (R100000) phambi kokuba akhululwe. Uzabuyela emthethwandaba mhlaka 24 Zibandlela 2019. Mhlaka 12 linyanga uDuduzane Zuma uzamiswa phambi komthethwanda esetheswa icala lokubulala engahlosanga kulandela ingozi yemota yakhe eyabangela imfa yabesifazana ababili. Sikhathi sinye uyise umnumnzana Jacob Zuma laye uzamiswa emthethwandaba mhlaka 27 linyanga laye esetheswa amacala enkohlakalo kwelinye icala elehlukileyo.

Facebook Forum

XS
SM
MD
LG