amalinks wokungena

Iqembu Lama Warriors Linqoba eleSeychelles

  • Joseph Njanji

FILE: Iqembu lama Warriors lidlale kahle kwele South Africa. (Photo: CAF)

Iqembu lama Warriors linqobe eleSeychelles 6-0 emdlalweni wenkezo yeCOSAFA Castle Cup ngoLwesihlanu, esigabeni sama1/4 final, odlalelwe enkundleni yeRoyal Mafokeng kwele South Africa.

Lokhu sokusitsho ukuba ama Warriors asengene esigabeni sama semi-finals omcintiswano wenkezo le.

Kusenjalo, umqeqetshi weqembu le Highlanders uErol Akbay uthi kabasoze badelele iqembu le Yadah mhla bedibana lalo ngeSonto emdlalweni we Castle Premier Soccer League ngoba leliqembu selike lakhombisa ikhono lokutshaya eziwayo.

Imidlalo yenguqu kusigaba se Castle Lager Premier Soccer League ingena kuviki yetshumi lesithupha kulimpelaviki njalo iqembu le Highlanders lizemukela iqembu le Yadah ngeSonto enkundleni yeBarbourfields.
Umqeqetshi weqembu le Bosso uErol Akbay utshele intathelizindaba zemidlalo ukuba iqembu lakhe kalisoze lilithathe kalula iqembu le Yadah loba nje kuliqembu eliqale ukudlala kusigaba sePSL lonyaka.

Iqembu le Yadah sengilibone kanye kuphela kodwa lilabadlali abaqinileyo njalo emdlalweni wabo owokucina banqobe iqembu le CAPS United nge 2-0 okutsho ukuba umdlalo wethu labo uzabe ungekho lula.
Njalo vele amaqembu ahlezi ngaphansi kwengalane adleka nzima.

Iqembu le Highlanders lizabe lingela mvimbi uBenson Phiri kuthi iqembu le Yadah liyabe lingela umdlali wenkabeni yenkundla uWellington Kamudyariwa njengoba bobabili laba abadlali beyingxenye yalabo abamiswe ukudlala yinhlanganiso ye PSL ngoba sebetshengiswe ikhasi lombala olithanga kathathu.

Imidlalo yeviki letshumi lesithupha iqale namhla ngoLwesihlanu lapho iqembu le Dynamos elemukele khona ele Bantu Rovers enkundleni ye National Sports Stadium.

Ngogqibelo iqembu le Tsholotsho lizadlala lele Triangle enkundleni ye Dulivhadzimo, enkundleni yeBaobab kuzakuba lomdlalo ogobhozisa amathe phakathi kweqembu le Ngezi Platinum lele FC Platinum, iqembu le Chapungu lizemukela ele Chicken Inn enkundleni ye Ascot kuthi iqembu le ZPC Kariba lizadlala lele Black Rhinos enkundleni ye Nyamhunga.

NgeSonto iqembu le Shabanie Mine lizemukela iqembu le How Mine enkundleni ye Maglas, iqembu le Harare City lizavakatshelwa ngele Hwange enkundleni ye Morris Depot kuthi umdlalo obekumele ube phakathi kweqembu le Bulawayo City lele CAPS United udluliselwe phambili njengoba iqembu le Makepekepe liphatheke kumncintiswano wokudinga intshantshu zezwekazi lase Africa.

Facebook Forum

XS
SM
MD
LG