amalinks wokungena

Breaking News

Bosso: Xolelani uRodreck Mutuma Osehambe Kuqembu leYadah


Modern Ngwenya

Ophethe isikhundla sikamgcinisihlalo weqembu le Highlanders uModern Ngwenya usekhuthaze abalandeli beqembu le Bosso ukuba bengamzondeli umgadli uRodreck Mutuma oseyehlukane laleliqembu wayadlalela ele Yadah.

Ekhuluma lentathelizindaba zemidlalo edolobheni lako Bulawayo namhla emini, uNgwenya uthe abalandeli kumele bazwisise isimo ebesibhekane loMutuma esokuthi imali abeyithola kuqembu le Bosso ibengeneli ukuba anakekele imuli yakhe ayitshiya esigodlweni iHarare laye aphinde ahlale kuhle edolobheni lako Bulawayo.

UNgwenya uthi ngemva kokuba lumdlali ebachasisele ukuba iqembu le Yadah liyamfuna njalo limthembisa imali ethe xaxa, bakhulumisane laye kanye leqembu le Yadah bavumelana ukuba ahambe ngesihle.

“Laye uMutuma kukhona ebesimkoloda khona kodwa yena uthe usecitsha konke lokhu ebesimkoloda khona njengeqembu akuselalutho esimkoloda khona, uzihambele kuhle.”

Ukuza kukaMutuma kuqembu le Highlanders ekuqaleni komnyaka kudabule phakathi abalandeli beqembu leli njalo emhlanganweni we extra ordinary general meeting obekhona ngempelaviki edluleyo amanye amalunga asole kakhulu ukuthengwa kwabadlali abasuka ngaphandle kwedolobho lako Bulawayo bona okucatshangelwa ukuba bayabe bezodinga umsebenzi kuphela kodwa bengelathando leqembu.

Omunye walabo abasolayo nguIsaac Donga othe, “Nxa ungabuyela emuva siye ku 1986, abantwana esasilabo babengabamntwana balumganga, abasenza saba yinqaba phezu kwenqaba. Namhlanje thina sesiyizidwedwe ngenxa yokudinga omzalazo, esingabaziyo ukuthi bengomzalazo benjalo bazasinceda ngani.
“Mina bengicela ukuba iHighlanders ngeyethu kulumkhono welizwe, usekelo lwayo kaluvele kuwo wonke amagumbi elizwe kodwa kayakhiwe yithi. Asiyekeleni ukuzenza ongqavungqekethe sithatha abantu abangasibo sibafaka emakhwapheni.”

Ekufikeni kuka Mutuma kuqembu le Highlanders kulosomabhizimusi owayethembise ukuba uzakhokha imali yakhe eye signing on fees kodwa akasakwenzanga lokho.
Iqembu le Highlanders lithola usekelo lwemali oluvela kubhanga le BancABC kodwa leyomali seyaqunywa okokuthi isisenela ukubhadala abadlali kuphela.
UNgwenya uthi uMutuma njengomdlali ofike kuqembu le Bosso imali ivele isiqunyiwe ubephiwa imali enganganani njalo inkokheli yeqembu le Bosso izwisisile izikhalazo zakhe njalo isicelo sabo ngesokuba labalandeli bazwisise.

“Usukile kodwa akathabanga ngoba kade esafuna ukudlalela iqembu lethu kodwa imuli yakhe ibisimhlupha isithi nxa imali yakhona nxa ingeneli phenduka sihlupheke sindawonye ngapha eHarare yikho ke uhambile ukhonangale eHarare njalo simfisela impilo enhle khonale.”

Phezu kokuba uMutuma wesule isikwelede abesikolodwa liqembu le Highlanders iqembu le Yadah likhokhele iqembu le Highlanders imali eyokumthenga njengoba lumdlali ubelokhu esaselesivumelwano somsebenzi leqembu le Bosso kodwa uNgwenya akathandanga ukutsho ukuba baphiwe malini.

Facebook Forum

XS
SM
MD
LG