amalinks wokungena

Breaking News

Iqembu leHighlanders Lilahla Phansi Amanye Amaqembu Emidlalweni yePSL


Iqembu leHighlanders lidlala kahle lonyaka.

Umqeqetshi weqembu lenguqu ele Highlanders uMadinda Ndlovu uthi abasoze belandele izifiso zabasekeli baleli qembu ezokufuna ukuphakamisa isicoco seligi lonyaka kuphela kodwa bazaqhubeka belenjongo eyokuphendukisa isiko njengalokhu okukuhlelo lwabo olweminyaka emithathu.

Iqembu leHighlanders selinqobe emidlalweni yalo emine phakathi kwemihlanu eseliyidlale lonyaka esigabeni seCastle Premier Soccer League.

Lesi simo sesidale ukuba abanye babalandeli baleliqembu bekhangelele ukuba mhlawumbe lonyaka lingaphakamisa isicoco se ligi kodwa uMadinda uthi bona abangeke belandele izifiso zabasekeli beqembu kodwa bazagxila kulokhu okuvele kuqukethwe zinhlelo abazibumbe ngesikhathi eqhatshwa.

“Abalandeli balelungelo elokukhangelela ukuphakamisa isicoco kodwa thina nxa singalandela izifiso zabalandeli asingeke sifeze injongo yethu esayivumelana njengeqembu okuyiyo emqoka kithi. Kuhle ukuba siyenelisa ukudlala sinqobe kodwa akusikho okumqoka ngalesisikhathi njalo okwakhathesi ngiyathokoza ukuba indlela esidlala ngayo yenza ukuba abalandeli baze ngobunengi babo enkundleni.”

Ngesikhathi eqhatshwa kuqembu leHighlanders uMadinda Ndlovu walobelana isivumelwano esomsebenzi eseminyaka emithathu njalo umnyaka wakuqala ngowokuvuselela isiko leqembu leHighlanders.

Lokhu ngokugoqela ukudlalisa abafana abakhulele kulo iqembu leBosso kanye lokudlala kusetshenziswa kakhulu umhlubulo wenkundla.

Umfoka Ndlovu kanye lenkokheli ze Highlanders zathi okwesicoco bavele abakukhangelelanga lonyaka loba nje bengakwemukela ngezandla zombili nxa kungenzakala ukuba bezithole sebesiphakamisile ekupheleni komnyaka.

Iqembu le Highlanders lihlezi endaweni yesithathu engalaneni yemiklomelo lilemiklomelo elitshumi lantathu okulinani elilingana leqembu elihlezi endaweni yesibili engalaneni ele FC Platinum kuthi endaweni yakuqala kuhlezi iqembu leNgezi Platinum lona eselinqobe kuyo yonke imidlalo emihlanu eseliyidlale lonyaka.

Abafana beNgezi batshaye abe Chicken Inn nge 1 ka nya ngoMgqibelo kuthi ele FC Platinum litshaye ele Chapungu nge 2 ka nya.

Iqembu leDynamos litholakala endaweni yesibili nxa usuka emsileni wengalane ngemva kokuba lenelise ukubuthelela imiklomelo emibili kuphela emidlalweni emihlanu esidlalwe kusigaba se Castle Premier Soccer League.

Facebook Forum

XS
SM
MD
LG