amalinks wokungena

Breaking News

Iqembu leMagwegwe Nottingham Linqobe Kumncintiswano Wenguqu


Iqembu leMagwegwe Nottingham.
Iqembu leMagwegwe Nottingham.

Iqembu labasakhulayo ele Magwegwe Nottingham linqobe kumncintiswano wenguqu obungenwe ngamaqembu amathathu oqhutshelwe elokitshini lase Magwegwe Old ngoMvulo.

Lumncintiswano ungenwe ngamaqembu amathathu abalisa ele Magwegwe Nottingham okuyilo eliqoqe limidlalo, ele Golden White kanye lele Toronto.

Ele Golden White yilo elinqobe kumncintiswano wabaleminyaka elitshumi lane ngemva kokunqoba ele Toronto nge 5 ka 4 ngemva kokutshaywa kwembekwa.

Isikhathi besiphele kungela qembu elenelise ukulitshayela emambuleni.

Iqembu le Golden White litshaye ele Magwegwe Nottingham nge 2 ka 1 kusemi final kuthi ele Toronto lihle langena kufinal.

Kumncintiswano wabafana abaleminyaka elitshumi lesithupha iqembu le Magwegwe Nottingham yilo eliphakamise inkezo ngemva kokunqoba ele Golden White nge 2 ka nya.

Emdlalweni we-semi-final iqembu le Golden White linqobe ele Toronto nge 2 ka nya kuthi ele Magwegwe Nottingham lihle langena kufinal.

Kumncintiswano wabaleminyaka elitshumi lathoba minwe mbili iqembu leMgwegwe Nottingham yilo eliphakamise inkezo ngemva kokunqoba ele Golden White nge 4 ka 2 ngemva kokutshaywa kwembekwa.

Isikhathi besiphele zingutshiki lobhanqa 2 ka 2.

Ilunga leqembu leMagwegwe Nottingham uCharles Mpinga uthi isifiso sakhe ngesokuba umphakathi uphathisane laye ukuze lumncintiswano ukhule.

“Injongo yethu ngeyokuthi abantwana bezikhuthaze beziqeqetshe ukwenzela kusasa. Uhlupho nje yikuthi imali kayitholakali lalabo abakade befisa ukuphathisa bahlutshwa yimali yikho ngenza lokhu ngikhupha esambeni sami. Engikukhangelelayo labadlali abake badlalela iqembu leMagwegwe Nottingham bephathise ukuze sivulele ilokitshi lethu.”

Umqeqetshi weqembu leGolden White uKhotso Nyathi ukhuthaze ukuba ngomnyaka ozayo lumncintiswano wenziwe kungakafiki isikhathi sekhisimusi ngoba esithi abantwana bayabe sebaya kukhefu.

Iqembu le Golden White kanye lele Magwegwe Nottingham afinyelele ukuyadlala kusigaba se Bulawayo Province Junior League Serie A ngemva kokuphutsha esendaweni ezimbili eziphezulu engalaneni yemiklomelo kusigaba sika Serie B Pool A njalo isiphathamandla seqembu le Magwegwe Nottingham uCharles Mpinga ithi kuzamele babophe ziqine ukuze benelise ukumelana lamaqembu adlala kuSerie A.

“Ku Serie B bekumnandi kakhulu labo abantwana besase lehuha elokuba badlale ibhola kodwa njengoba sesisiya ku Serie A sekumele sibukhathe kakhulu ngoba lapho esiya khona kunzima kodwa sikhangelele ukuba sizancintisa lathi.”

Amaqembu anqobe kumncintiswano wanamhla athi ele Magwegwe Nottingham Kanye lele Golden White aphiwe inkezo kuthi iqembu leToronto liphiwe ibhola njengesibongo esokuba lenelise ukuphatheka kulumncintiswano

XS
SM
MD
LG