amalinks wokungena

UMoses Ngwenya Wethula Emsakazweni weVOA Studio 7 Idlalade Elitsha


UMoses Ngwenya ngesikhathi esacula loDavid Masondo.

Ezra Sibanda

Iqembu Soul Brothers elaziwa kakhulu eZimbabwe ngokuthi ngaMasololo, selihwatshe idlalade elitsha elihlabusayo elikhanya lizakhathaza ngekhefu leKhisimusi.

Lidlalade lakuqala abalenzileyo ngemva kokutshiywa ngomunye wababili ababesele abayibo abasungula leliqembu, uDavid Masondo ngomnyaka ka2015.

Kujwayelekile ukuthi minyaka yonke iqembu leSoul Brothers liphakulele uzulu idlalade elitsha abantu abadlala ngalo iKhisimusi. Kumnyaka odlulileyo alizange likhiphe idlalade kulandela ukubhubha kukaMasondo.

UMoses Ngwenya, onguye osesele yedwa kubaculi ababumba iqembu le Soul Brothers njalo olikhokhelayo, uthi basebenze kahle ukuze bakhiphe idlalade leli.

ICD entsha eyeSoul Brothers ka2017 ibizwa ngokuthi Uphelile Uphelile uMndeni Wami.

Njengoba uDavid Masondo bekunguye obecula kuqembu leli, pho-ke uNgwenya usebenze lobani kulelidlalade?

“Lena yialbum eyokuqala esiyenzile selokhe satshiywa nguDavid Masondo. Kule ialbum ngisebenze naye uSicelo Ndlela njengoba besihlala sisebenza naye, noThokozani Hadebe kanye noNkosinathi Ngwenya lo oculela iMpumelelo yibo abafana abakumavoices kuzozonke izingoma la kule album.”

UNgwenya uthi idlalade leli alikathengiselwa abantu. “Lelidlalade leSoul Brothers elisha liyophuma ngoOctober towards end of October noma kanjani liyobeligcwele yonke indawo, ngiyazi, siyazi abalandeli bethu balibheke ngamehlo abomvu. Noma kanjani ngoOctober lizabe selikhona.”

Kusenjalo, kulogwalo olutsha olulotshwe nguye okaNgwenya oluthiwa The Life and Times of Soul Brothers in The Eyes of Black Moses Ngwenya. Uthi kukhanya abantu abanengi balamukele kahle kakhulu lolugwalo. Ubecabangeni aze alobe lolugwalo?

“Ngithe mangihleli ngicabanga ngibona isimo esesingayo kuSoul Brothers ngathi akesikhiphe lencwadi yeSoul Brothers, ibiography yeSoul Brothers eshoyo ukuthi iSoul Brothers yaqala kanjani, yaqala kungobani uThuza Mthethwa, Zenzele Mchunu, American Zulu, David Masondo kuzekube manje njengoba sokusele mina ngedwa. Ngithe angithathe lelithuba ngibhale incwadi ebizwa The Life & Times of Soul Brothers ikhuluma ngayo ibiography yeSoul Brothers ukuthi sisuka kuphi, saqalaphi kuphi, kanjani.”

UNgwenya uphinde wathi bayafisa ukuthi bayedlalela iKhisimusi eZimbabwe.

Iqembu leSoul Brothers lilabalandeli abanengi kwele Zimbabwe njalo uzulu ulilindele ukuthi angene ngalo kuKhisimusi idlalade leli. Kubakuhle ukuthi oGandaganda bethekelele eZimbabwe bayejabulisa abantu. Kambe kungenzakala na?

“ISoul Brothers iyafisa ukuthi izodlala kwele Zimbabwe kulonyaka ngoba siyazi ukuthi kade abantu nabalandeli bethu besikhalela eZimbabwe ukuthi kanti siza nini. Siyafisa ukuza kuloDecember lo. Kukhona ubhudi esikhulumisanayo naye kanti mangabe bekhona abalamandla okukhulimisana nathi ukuthi size ngempela sizodlala noma amashow angaba yi3 noma 4 eZimbabwe singajabula kakhulu ukuza eZimbabwe kungakapheli umnyaka.”

Amasololo liqembu elasukela kudala, kukhanya abadala labatsha bahlezi belithanda. Izingoma zabo ezinengi kumadlalade abo bahlezi bebonga ngosekelo abalunikezwa nguzulu weZimbabwe.

“Kubalandeli bonke beSoul Brothers, kuphi nakuphi labebakhona, sicela ukubonga kakhulu isupport abasinike yona kuzekube namhlanje. Siyazi saqala la kuleband singabafana abancane sinabo 15, 16, 17 years namhlanje sesingamakhehla, still abantu bayasisapota iSoul Brothers. Bayathenga amarecord akudala lamasha even labantu abancane labadala bayaqhubeka bayathenga lumculo wethu.

“Siyabonga kakhulu isapoti yenu, sibonge futhi bakubazali benu nina abadlala lengoma kunina lisesebancane emakhaya enu lapho emakhaya ngoDecember. Siyababonga labo abazali mabangabe besaphila, ma bengabe sebahamba emhlabeni mabalale ngokuthula. Siyabonga kini nonke balandeli be Soul Brothers eyenu leBand akuyona eyethu.”

Umndeni Wami lidlalade elitshisayo, lizakujabulisa, njalo iqembu leli kalipheli moya. OGandaganda baganda besiyaphambili.

Facebook Forum

XS
SM
MD
LG