amalinks wokungena

Breaking News

Iqembu Lenguqu eleCaps United Libikwa Selivukile


Iqembu lenguqu eleCaps United

Iqembu leMakepekepe linqobe ele Ngezi Platinum nge 3 ka nya ngempelansonto eyedluleyo okuyimpumela etsho ukuba liqhubekela phambili likhuphuka engalaneni yemiklomelo njengoba selihlezi endaweni yetshumi lantathu ikanti ensukwini ezedluleyo belihlezi endaweni yesithathu nxa usuka emsileni wengalane.

Umsekeli kamqeqetshi weqembu le CAPS United uMark Mathe uthi ngendlela iqembu leli eselidlala ngayo selizayala lilokhu linqoba.

Ngokubona kwami ngendlela abafana abaledlabuzane ngayo kanye lendlela esesidlala ngayo kuyatshengisela ukuba sesiqalisile esikwaziyo kodwa kupheleli lapho kuzamele siyale silokhu sisebenza silungiselela ukuze siyale sinqoba,” kusho uMathe.

Phambilini kokunqoba iqembu le Ngezi Platinum iqembu le CAPS United litshaye ele FC Platinum okungelinye lalo elilwisa ukuphakamisa isicoco lonyaka nge 2 ka 1.

Ukunqotshwa kweqembu le Ngezi Platinum Stars kulitshiye selihlezi endaweni yesibili engalaneni lingemva kweqembu le Chicken Inn elinqobe ele Black Rhinos nge 1 ka nya njalo elilemiklomelo engamatshumi amane lanhlanu njalo litshiya ele Ngezi ngemiklomelo embili.

Iqembu le FC Platinum lihlezi endaweni yesithathu lilemiklomelo engamatshumi amane lambili njalo linqobe ele Triangle nge 1 ka nya ngempelaviki edluleyo.

Kusenjalo imidlalo ye Zimbabwe National Youth Games iqale namhla emadolobheni abalisa ele Hwange, KoBulawayo kanye le Victoria Falls.

Imidlalo le yona kahle kahle iqoqwa yi sabelo se Matabeleland North kodwa idolobho lako Bulawayo licelwe ukuba liqoqe imidlalo efana le swimming, tennis, hockey, cricket, cycling, shooting kanye le handball njengoba kungelandawo zokudlalela limidlalo edolobheni le Hwange kanye lase Victoria Falls.

Eminyakeni eyedluleyo imidlalo ye Zimbabwe National Youth Games ibidlalwa ngabasakhulayo abangaphansi kweminyaka engamatshumi amabili kodwa lonyaka labaleminyaka elitshumi lathoba minwe mbili kanye labaleminyaka engamatshumi amabili lantathu labo bayingxenye yayo.

Lemidlalo yengezelelwe njengoba eminyakeni bekudlalwa imidlalo eyithoba minwe mbili kodwa lonyaka kukhangelelwe ukuba kudlalwe imidlalo engamatshumi amabili lambili.

Udaba Esilethulwe NguJoseph Njanji
please wait

No media source currently available

0:00 0:02:13 0:00


Facebook Forum

XS
SM
MD
LG