amalinks wokungena

Breaking News

Iqhubekela Phambili Imidlalo yeWorld Cup


Iran vs Portugal

Imidlalo eyehlandla elokucina esigabeni sezibaya kumncintiswano wezizwe zomhlaba iqale ngoMvulo lapho iqembu elimela ilizwe eliqoqa limidlalo ele Russia ebelincintisana lele Uruguay ukuphutsha imidlalo yalo lihlezi phezu kwesibaya sika Group A.

Iqembu le Uruguay yilo eliphutshe liphezu kwesibaya sika Group A ngemva kokunqoba ele Russia nge 3 ka nya. Limpumela itshiye iqembu le Uruguay lilemiklomelo eyithoba munwe munye njengoba linqobe kuyo yonke imidlalo yezibaya eliyidlale kusibaya sika Group A.

Iqembu le Russia lona liphutshe lisendaweni yesibili lilemiklomelo eyisithupha njalo zombili iUruguay le Russia zizadlulela kusigaba esilandelayo esomncintiswano lapho azadibana khona lamaqembu azaphumelela esuka kusibaya sika Group B wona azadlala ebusuku.

Endaweni yesithathu engalaneni yesibaya sika Group A kuleqembu le Saudi Arabia lona elitshaye ele Egypt nge 2 ka 1 okutsho ukuba liqede lilemiklomelo emithathu kuthi ele Egypt lizaphindela ekhaya lingazange lithole ngistho lowodwa umklomelo.

Izwekazi lase Africa selikhangelele kumaqembu abalisa ele Nigeria kanye lele Senegal ukuba mhlawumbe yiwo angadlulela kusigaba esilandelayo esomncintiswano njalo ele Nigeria lizadibana lele Argentina kusasa emidlalweni eyokucina eyesibaya sika Group D.

Intathelizindaba yezemidlalo uNash Mkokwayarira uthi abafana beNigeria babhekane lomthwalo onzima kakhulu.

Iqembu le Nigeria lilemiklomelo emithathu kuthi ele Argentina lilomklomelo owodwa.

Komunye umdlalo wesibaya sika Group D iqembu le Croatia okuyilo elihlezi phezu kwengalane lilemiklomelo eyisithupha lizadibana lele Iceland elilomklomelo owodwa. Lesisimo sithso ukuba wonke amaqembu akusibaya sika Group D alalo ithuba elokudlulela phambili nxa engenelisa ukunqoba ngoLwesibili.

Phambilini kwemidlalo yesibaya sika Grouyp D kuzabe kudlalwe imidlalo eyokucina eyesibaya sika Group C lapho iqembu le Australia elizadlala khona lele Peru kuthi ele France lizadlala lele Denmark.

Ele France yilo elihlezi phezu kwengalane lilemiklomelo eyisithupha kuthi ele Denmark lisendaweni yesibili lilemiklomelo emine.

Endaweni yesithathu kuleqembu le Australia elilomklomelo owodwa kuthi ele Peru lisemsileni lingela ngitsho lowodwa umklomelo.

please wait

No media source currently available

0:00 0:02:16 0:00

Facebook Forum

XS
SM
MD
LG