amalinks wokungena

Breaking News

Iqula leSADC Lifika eZimbabwe


Iqula ledale lephalamende lenhlanganiso ye SADC elifike eZimbabwe ngoMvulo ukuzohlola amalungiselelo okhetho lithi liyasuthiseka ngamalungiselelo asekhona manje.

Leliqula elikhokhelwa lilunga ledale lephalamende lakwele Botswana uMnumzana Dumelang Saleshando libambe umhlangano lekhomishini ebona ngokhetho eye Zimbabwe Electoral Commission-ZEC, emahofisini ayo e-Harare ngoLwesibili, ngenhloso yokuzwisisa ukuba linhlanganiso ingabe izimisele na ukuquba ukhetho olukhululekileyo ngendlela esegcekeni njalo lulempumela eyamukelekayo. USaleshando uthi kukhanya izinto ziqutshwa ngendlela esuthisayo okwamanje.

Iqula lakhe elizagqhiba umsebenzi walo ngomgqibelo lizabamba imihlangano lenhlangothi zonke ezilokwenza lokhetho okugoqela amabandla ezombusazwe, inhlanganiso ezizimeleyo lenhlanganiso zezindaba ingakavezi umbono ogcweleyo ngaloludaba. Umgcinisihlalo we ZEC uJustice Rita Makarau uthi inhlanganiso yakhe izimisele ukuquba lolukhetho mhlaka 31 Ntulikazi nxa lelo langa lingaqhubeka kuyilo okumele ukhetho lwenziwe ngalo ethi i ZEC izakwazisa langenhlaulo okumele abancintisa kukhetho beyibhadale.

Iqula leli likhangelelwe ukwethula umbiko ojulileyo ngemva kwenhlolisiso yalo ozanikezwa iqula lonke leSadc Parliamentary Forum eliyilo elizazohlola ukhetho ngokwalo elizweni lonke. Iqula leSadc yiloke elizakwethula umbiko ophathelane lokhetho ngokwalo lapho solwenziwe.

Leli qula liphinde lahlangana lamabandla ezombusazwe eHarare International Conference Centre phezu kokhetho oluzayo.

Umongameli Mugabe wazise ukuthi ukhetho lwenziwa mhlaka 31 Ntulikazi esithi ulandela isinqumo somthethwandaba wesisekelo sombuso owe Constitutional Court.

Ngakwelinye icele iSadc lamanye amabandla ezombusazwe kuleli esithi ludluliselwe phambili kulungisiswa izinto ezithile ezigoqela ukulandelwa kweziqondiso zokubunjwa kukahulumende womanyano ezilokhe zasala zilenga.
XS
SM
MD
LG