amalinks wokungena

Breaking News

Iqula le Zimbabwe Ebelilomhlangano Wokuhuga Osomabhizimusi e U.K Liphenduka Ekhaya Lilengise Izandla


Abantu behamba emgwaqweni e central London, kwele Bhilitane.

Umhlangano wezamabhizimusi owe Zimdaba London 2018 Investment Forum ugqitshwe kungela sivumelwano esicacileyo phakathi kwabezamabhizimusi basezwekazi leEurope leziphathamandla zengatsha ezitshiyeneyo zikahulumende weZimbabwe ebezizehuga abamabhizimusi elizweni labo.

Umhlangano lo owenzelwe esigodlweni seNgilandi iLondon ubuqoqwe nguHulumende emanyene lenhlanganiso yezizalwane zeZimbabwe esezihlala eBhilithane eye Consolidated Africa Services phansi kwenkuthazo kaMongameli Emmerson Mnangagwa yokuthi iZimbabwe isivulekile ukuzosungula ezamabhizimusi.

Abanengi abakade bekhona bebeveza ukwesaba bethi kabamthembi uHulumende kaMnangagwa

UMnunzana Million Moyo usomabhizinisi oyisizalwane seZimbabwe esihlala kweleBhilithane ngomunye obemenyiwe

Kutsho uMoyo: “Bebehlangene abantu abanengi kakhulu, bemenyiwe emhlanganweni wokuinvestor eZimbabwe, babuyile amaminister labantu abamele iZimbabwe ukuthi bozomema ama investors ukuthi abuye eZimbabwe njengoba uMnangagwa ethi iZimbabwe is open for business.

"Bacacile bona ngama opportunities akhona ikakhulu ngemining. Imbuzo ebekhona emnengi kakhulu, imbuzo emnengi ibiseyama ekutheni kambe iZimbabwe is it safe to invest, abasoze baphinde bavukelwe esempisi kumbe bavukelwe ngamaganyana laba abawabonileyo ngeskhathi esidlulileyo.

"Emhlanganweni enjengayenaleyi kujwayelekile ukuthi abantu babediplomatic nxa bebuza imbuzo kodwa bebekhona ade bebuza behlebahlahlele into ekhanda. Ngokubona kwami uhambe kuhle umhlangano kodwa ke abantu abalezimali zabo bakhangelele ukuthi ama elections azahambanjani njalo balembuzo emnengi ngelizwe lethu iZimbabwe ukuthi iInvestment yabo isafe yini lezimali zabo zisafe yini lokuthi bazazikhipha njani, basakuhluza kuzathatha iskhathi ngokubona kwami ukuthi abantu abanengi bakhululeke ukuthi bazofaka imali zabo elizweni lethu.”

Inengi labosomabhizimusi abakade bekhona emhlanganweni lo, lithi lesi yisikhathi sokhetho eZimbabwe ngakhoke alwaziwa ukuthi luyahamba njani. Umnunzana Duke Wood ngomunye walabo abathi ayisiso sikhathi esilungele ukuyasungula amabhizimusi bengakaboni ukuthi ukhetho luzaqhutshwa njani.

“Sizwile ukuthi uHulumende uthumele abantu ukuthi babuye bazosincenga ukuthi sizame ukubisela izimali ekhaya.

"MIna nginje ngisamelele ukuthi ngibone ukuthi kungena bani ukuthi abuse uMnangagwa siyakwazi ukuthi ubesebenzelana loRobert Mugabe bebulala ilizwe bebonke, yebo uthi setshintshile kodwa sisezakubona lokho. UChamisa laye angithandanga indlela ahlukumeza ngayo abanye. Sisamelele sibone ukuthi after elections ilizwe liyathula yini,” kutsho uWood.

Kusobala ukuthi ukubona kanye yikobona kabili, abezamabhizimusi balahlekelwa yinotho yabo eminyakeni edluleyo ngesikhathi sombuso kaMnunzana Robert Mugabe lapho imithetho yelizwe yayiguqulwa njalonje mahlayana. Okwenza njalo besabele khatshana yikuthi laye uMnangagwa wayesebenza loMugabe pho bamthembe njani ngemali zabo?

please wait

No media source currently available

0:00 0:03:30 0:00

Facebook Forum

XS
SM
MD
LG