amalinks wokungena

Iqula LikaZuma Lihlangana Lamabandla Akuhulumende Langaphandle

  • Ntungamili Nkomo

Izithunywa zikaMongameli Jacob zuma weleSouth Africa, ezisekwethekeleleni kwele Zimbabwe, zihlangene lamalunga ebandla leZanu PF laweMDC eHarare ngoMvulo. Lumhlangano ubu ngowokuhlaziya okutshiyeneyo okugoqela umhlahlandlela wokhetho lokunengi okuhluphayo kuhulumende womanyano.

Iqula leli belilamalunga agoqela isikhulumeli sikaZuma, uMnu Marc Maharaj loMnu Charles Ngqakula.

Amabili laba bahlangane njalo lamabandla amancane angekho kuhulumende womanyano athi iZapu, Mavambo/Kusile, Zanu Ndonga leMDC99.

UNgqakula loMaharaj bathembise ukuthi amalunga eSadc Troika, abalisa iTanzania, South Africa leZambia azathumela amalunga kunsukwana ezizayo azasebenzelana leJomic, njengokwethembisa kweSadc nyakenye emhlanganweni eyawenzela eMozambique.

Umhlangano lo uvumelene ukuthi kumele kubunjwe ugatsha olulamalunga eZimbabwe laweSouth Africa, oluzabona ngokugcwaliswa kwesivumelwano seGlobal Political Agreement kanye lakho konke okumele kuguqulwe kungakayiwa kukhetho.

Umhlangano weSadc oqhutshelwe kweleAngola ngeviki edluleyo ukhuthaze ukuthi amabandla akuhulumende alungisise konke okuhluphayo kungakayiwa kukhetho.

UMnu Tendai Biti loMnu Jameson Timba yibo abakade bemele iMDC ekhokhelwa nguMnu Morgan Tsvangirai emhlanganweni lo.

IMDC ekhokhelwa nguMnu Welshman Ncube ibimelwe nguMnu Moses Mzila Ndlovu loNkosikazi Priscilar Misihairambwi-Mushonga kuthi iZanu PF ibimelwe nguMnu Emmerson Mnangagwa loMnu Nicholas Goche.

UMzila utshele iStudio 7 ukuthi wonke amabandla aveze ukuzimisela ukulungisisa okuhluphayo kulumhlangano.

XS
SM
MD
LG