amalinks wokungena

Breaking News

Isigodlo seMelika Sisola Ukubulawa Kwelunga leMDC Ngabasekeli beZanu PF


Isigodlo seMelika eZimbabwe sesisole kakhulu ukubulawa kwelunga leMDC ekhokhelwa nguMnu Morgan Tsvangirai ngabasekeli beZanu PF eMudzi North.

UMnu Cephas Magura, obeleminyaka engamatshumi ayisithupha lasikhombisa (67), ucobodiswe ngoMgqibelo odluleyo kudlakela oluqhamuke ngemva kokuba abasekeli beZanu PF bechithe umhlangano weMDC eChimukoko Business Center.

Embikweni awethule ngoLwesine, obona ngokukhitshwa kwembiko kulesisigodlo uSharon Hudson-Dean uthe bonke abaphatheka kudlakela lolu kumele babotshwe.

Amapholisa athi sebophe abasekeli beZanu PF abayisithupha phezu kwesehlakalo lesi. Akukacaci ukuthi bazamiswa nini emthethwandaba.

Ummeli weMudzi North edale lephalamende uMnu Milton Kachepa lommeli weMudzi West uNkosikazi Acquilina Katsande babikwa babekhona udlakela lolu lusenzakala, kodwa ababotshwanga.

Abanye babasekeli beMDC laba balimele basiwa ezibhedlela, abagoqela uFungai Mahachi loRobert Dombo, bona abaphume ngoLwesithathu esibhedlela.

Ingcwethi ehlaziya ezombusazwe uMnu Dumisani Nkomo uthi isehlakalo lesi siveza sobala ukuthi abanye kuZanu PF basaluqakathekisa udlakela.

XS
SM
MD
LG