Isigodlo someli weBhilithane eZimbabwe sethule umbiko sisola udlakela osolumemetheke eHarare, emizini egoqela iMbare,Glen norah leBudiriro. Umeli weBhilithane uMnumzana Mark Canning uthi udlakela lolu lubangelwe ngabebandla leZANU PF.
UCanning uthi uhulumende weBhilithane ubelethemba elikhulu kuhulumende womanyano esithi osokumangalisa yiloludlakela osolukhanya soluvuswa yilabo abalenjongo yokuziphakamisa kwezombusazwe.
Uthi njalo isimo esiseZimbabwe khathesi asisoze senze amazwe alobudlelwano lalo ukuthi abelentshukuntshu yokukhuthaza izizalwane zalamazwe ukuyahlanyela imali kwezamabhizimisi eZimbabwe.
UBrenda Moyo weStudio 7 ukhulume lengcwethi ecubungula ezombusazwe uMnumzana Mqondobanzi Magonya othi udlakela luveza ukuthi inkokheli yebandla le ZANU PF ifuna ukuqhubeka igogodlele embusweni.
Kunjalo nje isikhulumi samapholisa uMnu. Wayne Bvudzijena utshele iphephandaba le The Herald ukuthi kusobala ukuthi udlakela oluqhamuke endaweni ezitshiyeneyo eHarare lubangelwa ngabasekeli bebandla le MDC.
UMnu. Bvudzijena uchasise zonke izehlakalo zodlakela ezenzakalayo, etshengisa ukuthi amalunga eMDC yiwo atshaya awe ZANU PF, wona acina ezivikela.
Kulandela umbiko kaMnu. Bvudzijena, icele leMDC elikhokhelwa nguMnu. Morgan Tsvangirai lethule umbiko lamuhla lisola amazwi akhe lisithi lona lilobufakazi obuqotho njalo lizibonela ngawalo amehlo ukuthi amalunga e ZANU PF pf yiwo ahlasela awe MDC.
Kusenjalo, inhlanganiso ye Youth Forum, yona ekhankasela ukuthi abatsha bebhalisele ukuvota isebenzisa ama text messages abomakhalekhukhwini ithi abacatshangelwa ukuthi ngamapholisa lamuhla babahlukuluzile ehofisini yabo eHarare babathathela eminye imbalo yabo.
UNkosazana Faith Nkomo, isiphathamandla seYouth Forum eGwanda, utshele uSithandekile Mhlanga we Studio 7 ukuthi uhlelo lwenhlanganiso le lukhangelele ukukhanga ontanga abedlula inkulungwane ezilitshumi lasitshiyagalombili-18,000 njalo luyaphumelela yikho amapholisa ebahlukuluza.
